المبدعون في الأرض - 7

يتوالون في طريقي بالصدفة البحتة كلما اظن ان سلسلة  ( المبدعون في الأرض )عدد حلقاتها قليل واني تسرعت عندما استهوتني الفكرة لدرجة ان احلم بعرضها كباب او حلقات على عدد من الصحف و المجلات ومن قبلهم تقديمها في مدونتي وحتى ان الصحف والمجلات التي عرضت عليها هذا الباب لم يتشجعوا في تقديمه  رغم ثنائهم على الفكرة و طريقة عرضها لان العثور على مثل هؤلاء النوعية من المبدعون صعب ومحدود جدا وغالبا ما سيأتي بالصدفة البعيدة وان يكون مصور الجريدة حاضر في هذه الصدفة غير انهم نوعية تهرب من التصوير او لا يملك مجموعة صور تستعين بها مما سيفقد الباب الصدق والموضوعية ولا يمسكون بمحمول او يملكون تليفون أرضي حتى نعاود تحديد موعد بديل معهم ..فعلاً اتذكر ان اول مبدعة التي احدثت صدى في عالم التدوين .. ( غلبتني عشان اخدها معايا عند مصور J وكنت ايامها لسة مجبتش موبايل بكاميرا و لا هي طبعا عندها صور شخصية ) وكنت فقدت الأمل منذ عامين تقريبا في ان تستعيد هذه السلسة تكوين حلقاتها الى ان ذهبت بالصدفة وعلى غير ترتيب لمركز ثقافي معروف ومررت من امام المسرح فوجدت حفل تقديم مواهب شابة في التقليد و الغناء والشعر والزجل والمونولوج بحيث يتقدم اي ممن يجلس وسط الجمهور الشاب نحو المسرح ويصعد و يقدم ما يجيده ولكنها كانت تقتصر على الشباب فقط  و الحقيقة كانت اغلبها مواهب كسيحة و لم يشعر الحضور بالجدية في موهبتهم بل شعرنا كلنا ككجالسين بانهم هواة استعراض يخلو من الصدق والروح لا اكثر ويقحمون الثورة في ما يقدمون اقحام غير موظف بشكل جيد وكشوف للغاية  وكان تصفيقنا لهم كسول ضعيف...وفجأة صعد رجل مسن جدا ترتعش قدماه و المايكروفون يهتز بيده و يرتدي جلباب بلدي وطاقية بينما يعجله الشاب الجالس على المنصة الذي يدير الحفل مبتسماً : متنساش يا حاج في السريع عشان ندي فرصة للشباب من فضلك

الحاج : يعني ما قولش القصيدة للاخر ؟

قول على قد ما تقدر بس في السريع يعني

(اكتر حاجة غاظتني ان الموبايل هنج في اللحظة دي ومعرفتش اسجل للشاعر العجوز لايف لكن عوضتها معاه برة في حديقة المركز J )

وبدا الشاعر العجوز واذا بيده تقف عن الاهتزاز و صوته يعلو فجأة مجلجلا واثقا و انطلق J

أنا إللي إسمي نغم فرع غُنى و مواوي

أنا مصر أن الحضارة مهد الهرم والنيل

تاريخي كله جهاد كتبوه الرجال والولاد

مغفورلي جيل ورا جيل

بساطي أخضر مزهزه

رسمولي بستاني وزوقوه بالنخيل والورد علشاني

ولما اعطش نيلي يرويني

يزيدني خضرة و بعد تعبي يحييني

كريمة بس على أرضي دخيل

ولادي قاموا بثورة وطردوا كل دخيل

من فرحتي بثورتي غنيت ألحاني حقد عليا الطريد

حب يعود تاني

توقف مرتبكأ وعاد يرتعش قليلأ بج المسرح بالتصفيق الحاد هنا قال له الشاب المسئول عن الحفل  : ندي فرصة باه للشباب بعد إذنك ؟

ونزل الشاعر العجوز من على المسرح والموبايل مازال في تهنيجه ... فأسرعت وراءه لألحق به في حديقة المركز قبل أن يختفي وبدأ سترسل مثلما فعل

معي زملاءه من المبدعون في الأرض فقد لاحظت انهم لا يفضلون طريقة السؤال والجواب !!!!

إسمي عبد الحميد العدوي من الصعيد من عدي أسيوط عندي 80 سنة والحمد لله  - بقال - حجيت 5 مرات وعشرين عمرة والحمد لله بفضل الله أنا عضو رابطة الزجالين سنة 76 .. عارف مسمتيش عني ما فيه ناس كتير غي الرابطة محدش يعرفهم وبعدين يا ستي انا كنت مشغول في تجارة البقالة دي وبجري على بيتي وكنت بكتب الشعر بتاعي في كشاكيل وأشيله قلت احوش غنتاج لحد ما أفضى وألاقي وقت ولادي يشيلوا عني التجارة واتفرغ باه للموهبة دي إللي اعطهاني ربنا !!!!

انا شغال في البقالة من وانا صغير أصلي قعدت في المدرسة سنتين بس و اهلي خرجوني بس انا كملت مع نفسي في كتب تعليم الكتاةب و القراية عشان اقدر أسجل الموهبة إللي إدهاني ربنا دي .. بس طبعت ديوان  باللغة الدارجة زمان على حسابي في مطبعة كده مش دار نشر ولا حاجة ولا عرفت اوديه المكتبات ووزعته على معارفي واهلي واصحابي والباقي عندي إسمه ( أم الحضارة ) وعندي 3 دواوين تحت الطبع

ما شاء الله وصلت لدور نشر اهوه كويس ؟

لأ لسة  ناوي أوديهم مطبعة تطبعهم زي الديوان القديم انا مرتبهم عندي في كشاكيل

أه .. يعني مش تحت الطبع باه لسة هيروحوا

أقولك أساميهم ؟ مش إنتي هتحطيلي الحجات دي ع النت بتقولي ؟

اه قول كل إللي عاوزه

إسمهم ( مريم البتول – أغاني ع الشط – منوعات )

مبتكتبش عاطفي زي الاغاني إللي بتقولها ام كلثوم و عبد الحليم كده ؟

لا لا بعدين فاهمة إنتي .. بعدين يعني

انا باه معرفش إزاي أعمل لنفسي ندوات زي الأدباء إللي بشوفهم في التليفزيون و لا اعرف إزاي حد يطلعني في التليفزيون بس لسة قريب قايل لولاد ولادي يطلعوني على الفيس بوك إللي ده إتعملت منه الثورة أصل هم عندهم كومبيوتر ونت وبيعرفوا يشتغلوا عليه .. مش إنتي هتحطي الحاجات دي ع النت بتقولي

أيوة والله

طب قولي باه إيه رأيك في القصيدة إللي قولتها ؟

100 100 يا حاج

وأنا بأه حبيت الشعر عن أستاذنا الله يرحمه بيرم التونسي وكان عندي عندي محل في المبدح وكان جنبنا قهوة على ناصية الشارع إسمها لوكس بيعد عليها عم بيرم وكنت أسمعه وه وبيقول شعر وسط قدام ناس قاعدين معاه وحبيت أغانيه اوي والزجل بتاعه وبعد كده بقيت أجيب دوواوينه ب 3 تعريفة و4 تعريفة و بعد كده بقيت أروح سور الأزبكية أجيب كتبه ب 3 صاغ و4 صاغ

ودي اول مرة بصراحة أقول فيها شعر ليا قدام ناس معرفهاش قعدة بتتفرج وعلى مسرح وكده وناس تصقفلي .. ومكنتش عارف إني هعمل المشوار ده إنهارة يمكن جيت عشان إنتي تشوفيني و تحطي كلامي على النت أنا كنت جاي أسلم على صاحب المركز وكنت شفته قبل كده في التليفزيون مع ( معز مسعود ) وعجبني كلامه وحسيت إنه راجل خلوق فألتقت الأرواح والأرواح بتلتقي قبل ما تتلاقى الوجوه وما إئتلف منها إئتلف و ما إختلف منها إختلف فلقيت الحفلة دي وناس بتطلع تقول شعر فأستأذنت من الشباب إللي كانوا ماسكين الحفلة أطلع أقول شعر والحمد لله زي ما شفتي

وبإذن الله ناوي أعمل فرقة إنشاد ديني لإني عندي قصائد دينية كتيرة وغير تقليدية يعني بتتكلم عن الاحداث إللي بيعيش فيها المسلمين اليوم واخدة بالك ؟ والتوفيع على ربنا ..  يعني عندي قصيدة إسمها ( أنا مسلم انا مش إرهابي ... وقصدية إسمها مريم البتول دي بكلم فيها عن إننا مسيحين و مسلمين كلنا عندنا رسل جاؤا من أجل السلام فيله نسخر من بعض و نحارب بعض وكتبتها أيام الصور المسئية للرسول بإعتبار الرسول إبن مريم رسول سلام ومحبة زي رسولنا فليه تشتمونا ؟ )

أقولهم ؟

هخليك تقولهم فيديو

طيب يعني لما احب طيب اعزمك على ندوة تقول فيها شعر أوصلك إزاي إنت ممعكش موبايل ليه ؟

ههههههههه إن شاء الله هجيب أصلي مبحبهوش و لا بعرف أشتغل عليه

إيه أكتر حاجة باه بتحبها لعم بيرم ؟

قال: إيه مراد ابن آدم؟
قلت له: طقه
قال: إيه يكفي منامه؟
قلت له: شقّه
قال: إيه يعجّل بموته؟
قلت له: زقه
قال: حـد فيها مخلّد؟
قلت له: لأه

طب وإنتي إيه أكتر حاجة من إللي قولتها قدامك إنهاردة عجبتك ؟

فألتقت الأرواح والأرواح بتلتقي قبل ما تتلاقى الوجوه وما إئتلف منها إئتلف و ما إختلف منها إختلف

موضوعات مشابهة

--------------------------

http://aliahlim.blogspot.com/2009/12/6.html

http://aliahlim.blogspot.com/2008/10/5.html

http://aliahlim.blogspot.com/2008/06/4.html

http://aliahlim.blogspot.com/2008/02/3.html

http://aliahlim.blogspot.com/2007/12/blog-post_22.html

http://aliahlim.blogspot.com/2007/11/blog-post_16.html