هل تذكرون الشخصية المذهلة التى اداها بأقتدار الفنان الراحل ( محمود مرسى ) ؟ و المواقف الضاخكة الباكية التى حدثت له نتيجة أصتدام مثاليته بواقع مبعثر ملئ بالأهمال و الا مبالاة و أصحابه الذين أعطوا لضمائرهم أجازة مفتوحة ثم انتهى به المطاف الى مستشفى الأمراض العقلية فى نهاية الجزء الثانى ؟
رأيت نفسى وقتها فى هذا الرجل فكم تعرضت لمواقف مضحكة مثله و سخرية الأخرين منذ دخولى الجامعة نتيجة لخروجى من زمن الأبيض و الأسود فجأة دون ان أستعد لزمن الألوان
أبو العلا هذا ظهر لى منذ فترة بلحمه و دمه تحدثت معه فى المركز الثقافى الذى اعمل به جاء أليه يطلب المساعدة
تسمعوا الحكاية ؟
حاضر ... حقولها م البداية
دخل أبو العلا من الباب الرئيسى يمسك بيده صندوق خشبى شكله غريب يتضح لى انه من التراث القديم و لكن علامات الزمن غيرت منه كثيرا تماما كوجه من يحمله كان طويل و جسده لا يبدوا عليه الوهن كثيرا كمن فى مثل سنه و عيناه تمتلأن أمل مشع و أصرا رغم رعشة بسيطة فى يده ، ربما من ثقل الصندوق كان ينظر للشباب و يبتسم لهم مشيرا ألى ثقل الصندوق ربما كان يظن أن أحدا منه سيحمله عنه من باب الذوق لكنه ظل هكذا حتى اقتربت منه
أبو العلا : لا يا بنتى ده تقيل عليكى يظهر الشبان هنا مشغولين أوى ربنا يكون فى عونهم .. صباح النور الأول .. أنا جيت هنا بعد عذاب الحقيقة و اعتقد أن ربنا بيحبنى لأن أنتهى بيا المطاف هنا
انا : طب حضرتك حط الصندوق ع التربيزة الأول
أبو العلا : أه صحيح .. على فكرة أنا مش مضايق من كتر غلاوة الحاجة الى جوه الصندوق دى عندى بحب أحضنهم كده كتير
انا نظرت له نظرة أستغراب من طيبته و رومانسيته و لسان حالى يقول ( هو فيه حد كده دلوقتى ؟) أأمرنى حضرتك
أبو العلا : فتح الصندوق فوجدت بداخله قطع فنيه من الخشب و العاج مطعمة بالصدف أقل ما يقال عنها أنها رائعة
انا : حضرتك الى عاملهم ؟
أبو العلا : بقالى عشرين سنة شغال فيهم ما رضتش أستعجل عشان يطلعوا بالجمال ده انتى عارفة أن دافنشى رسم الموناليزا فى أربعتاشر سنة ؟
انا أيوة عارفة ماأنا فنانة تشكيلة بس مع أيقاف التنفيذ
أبو العلا : أنا بعد ما قاعات معارض كتير رفضونى عشان مش مشهور و ماليش معارض قبل كده سمعت عنكوا هنا تحمست جدا أنى أعرض أعمالى فى مكان يقدر الفن للفن بس و مهتم بالثقافة أنتوا بتعرضوا مجانى مش كده ؟
( قعد ساعتين يكلمنى عن اهتمام الشباب بالثقافة على أيامه و أزاى كانوا الكبار بيحتوا الشباب و يساعدوهم )
انا : أولا أنا مش مسؤلة عن المعارض
ثانيا : كنت أستعجل فى عمايلهم على أيام حضرتك كنت حتلاقى الى ينزل من بيته أصلا عشان يتفرج عليهم
ثالثا المجانى ده كان لفترة مخطط يعنى دلوقتى القاعة تمنها معدى الثلاث ألاف غير أن لوازم العرض علىحسابك غير ان لازم المركز ياخد من الأرباح غير أنك شرط أساسى تكون عملت معارض قبل كده ( نظر الرجل أليا مصدوم ) انا بقولك الى محدش غيرى حيصارحك بيه هنا عشان نهاءى عشان يبانوا ذوق و لطاف و كده عشان الأعلام و شكل المكان أرجوا أنك تفهأوفر عليك التعب و أنت راجل كبير حتروح و تيجى و ماحدش حديك رد منى
أبو العلا : طب بصى عربيتى مرهونة من زمان عند أبن واحد صاحبى حروح أشرحله الموقف و هو أكيد ولد شهم زى والده الله يرحمه يدهانى و ابيعها دى تساويلها كتير
انا : بس حضرتك متأكد غنه هيديهالك من غير ما تفك رهنها ؟ وهي ماركتها إيه ؟
أبو العلا : رمسيس
انا : أيه ؟؟؟؟؟؟؟؟؟؟؟؟ بس دي مين هيشتريها ؟؟؟؟
أبو العلا : أنا حاسس انك بتسخرى منى ؟ أنا قد جدك
انا : لا و الله أنا أسخر منك أزاى ؟ ده أنا كنت أتمنى اعيش فى زمانكوا دلوقتى مش زى ما حضرتك فاكر كل حد يقول أنه مهتم بالفن و الثقافة تصدقوا دلوقتى كل حاجة وراها مشروع أستثمارى و الربح فيه أساسى مش مصدقنى أدخل اتفهم مع المدير بنفسك يمكن يرضى ما حدش عارف
__________
دخل أبو العلا و سمعنا جميعا صياح و تجريح و سخرية و خرج و هو يحتضن صندوقه و قد أزدادت رعشة يديده فأقترب راجل مسن من العمال حمله عنه أقتربت منه
دخل أبو العلا و سمعنا جميعا صياح و تجريح و سخرية و خرج و هو يحتضن صندوقه و قد أزدادت رعشة يديده فأقترب راجل مسن من العمال حمله عنه أقتربت منه
أنا: ( ضحكت كى أمسح الحزن عنه قليلاً حاولت أوجد له حلول أخرى وأكتب له اماكن اخرى تفتح المجال للمواهب الشابة وباسعار رمزية ربما يجد من يضع له إستثناء بالنسبة لسنه )
------------------------------
أشكر صاحب القصة على موافقته على النشر
و اتمنى ياأستاذ انك تلاقى حد يدخلك على
النت تقراها و تشرفنى بتعليقك
و اتمنى ياأستاذ انك تلاقى حد يدخلك على
النت تقراها و تشرفنى بتعليقك
40 comments:
اولا بيسعدنى انى اعلق اول تعليق على قصتك الجديدة واسلوبها سهل ومبسط لكن لو كانت قصيرة شوية كانت هتبقى كويسة لكن ارجع واقول ان دة لا ينتقص من جمالها اطلاقا
الابداع في هذا الزمن يحتاج الي صمود ومثابره وتحدي ,قد تقف في وجهه العراقيل ولكن مع الاصرار والامل سيحقق المبدع ما يصبو اليه
تحياتي وسلامي
رائع اوى يا عاليه بجد شدتنى اوى ربنا يوفقكك باذن الله وتحققى احلامك وكل اللى تتمنيه
بس احب اقول كمان عاليا اوعى تعملوا زى ابو العلاوتيأسى كدة او أى حد عموما مبدع لان اليأس فعلا قاتل الاحلام
ولو استسلمنا له هيكون اقوى ويسحقنا
وشكرا لانك فكرتينا بقصتك بنفطة مهمة
زى دى
تشكرات
عزيزتى
فى ناس حلوة كتير قوى
احلا من اللى بنشوفهم فى التليفزون
ناس صوتها احلا
شخصيتها احلا
دماغها احلا
فناها احلا
بس ربنا مكتوب عنده
لناس النجاح والصعود
وناس تانيه الفشل والسقوط
ولحكمة هو يعلمها نجاح حد ممكن يكون شر ليه
وسقوط حد ممكن يكون خير ليه
ربنا يريح قلب ابوالعلا
ليه مخلتيش اغنية المسلسل بتاع ابوالعلا برضوا لعلى الحجار بس اظن احلا من دى
تحياتى
سلام
والله قصه جميله بس تخيلت ان الصندوق ده فى زيت او سكر
عاليا
عارفة معنى الكلام ايه
اننا بنقول له روح موت
ان ابسط حقوق الانسان ان يجد ما يبره وينظر له نظرة متعاطفه
ما الذى يجرى لو واحد من اللى بيعرضوا اخذ كورنر صغير ووضع هذا التحفة فى ركن بعيد
عاليا اكيد فى وسائل للمساعدة لا يعلمها الا العاملين فى المكان وبدون تكلفة
ابو العلا قتلته المثاليه الزائدة والبعد عن الواقع
تحياتى
بجد يا عاليا القصه جميله جدا وطريقه حكايتك ليه حلو اوى انا بس عاوزه اقول لابو العلا ان شاء الله مش هتبقي دي الخاتمه والدنيا اكيد هتضحك لان انت تعبت فى الحاجه دي وربنا ما بيضيعش مجهود حد على الفاضى وربنا يكرمه ويوفقه في طريقه
وفعلا يا عاليا زمانا بقي وحش اوى لان نماذج الناس الوحشه بدأت تغطى على الناس الحلوه ونظرت الناس فعلا بتحسي انك خارجه من زمن الابيض واسود ومعظم الناس بقت اهم حاجه عندهم الاستثمار والفلوس ومش مهم مبادئ ولا فن ولا الكلام ده كله بس الموضوع ده مش هيتحل غير لما المواقع المسئوله دي يمسكها ناس بتقدر الفن وفى نفس ذات الوقت يكون في عائد مادي وثقافي
ربنا يكرمك ويوفقك
كثيرا مايكون الشرفاءو المبدعون مادة إعلامية دسمة للصحف والمجلات ، ووكالات الأنباء والإذاعات ، والقنوات والفضائيات ،وكذلك قوائم المخابرات ولكنهم لايعنيهم هذا؛ فالمهم أن يكونوا حديث الملأ الأعلى
لانهم غالبا يكونون موتى حينذاك
الكلمة دي فعلا تجيب الأرق
ثقافة
والكلمة الأصعب
اهتمام
ربنا يكون في عون أبو العلا
واللي زيه
ازيك يا عاليا , عاملة ايه؟
أنا مرة اقترحت على الناس اللى حواليا اننا نعمل جمعية ثقافية عشان الرجل ده واللى زيه واحنا كمان
لقيتهم كلهم ببساطة بيضحكوا وقلبوا الموضوع هزار
الخلاصة , ماتعرفيش دافنشى رسم الموناليزا فى 14 سنة وكام دقيقة بالضبط :)
السلام عليكم
المثاليه فيواقعنا الحالي اصبحت شئ من العدم وان وجدت ولكن ليس بالقدر الكافي كما نحب
والاصطدام بالواقعية شكل امر لان المثالي يعتقد ان كل شئ جميل
ولكن عندما يصطدم بالواقع يفقد كل شئ
عاليا ياقمر ازيك
جميل الموضع اوي بجد اسلوبك حلو في الكتابه
سلامي ليكي ياعسل
وزة
مصطفى محمود :)
و انا كمان يسعدنى انك تكون اول تعليق و ان اسلوبى يكون سهل و مبسط بالنسبة ليك ، معلش كانت الامانة تقتضى انى اقولها بالظبط عشان الصورة تتضح امامى و انا عادة ما بحبش اطول فى موضوعاتى بس فيه حاجات كده بتفرض طولها :)
تحياتى
-----------------------
rack -yourminds :)
كلامك طالع منه حكمة جميلة
-----------------------
رحيق الحب :)
ربنا يكرمك و يوفقك انتى كمان
ألف شكر
--------------------
مصطفى محمود :)
سعادتى زادت انى فكرتك بنقطة مهمة زى دى ، أى خدمة يا باشا
---------------------
أحساس لسة حى :)
عزيزى و الله ما قابلتش حد فى الواقع بمثالية و طيبة ابو العلا البشرى غير الراجل ده
ما لقتش التتر بتاع ابو العلا قلت دى أقرب شوية للموضوع
تحياتى
صوت من مصر :)
ليه تخيلت ان الصندوق فيه زيت او سكر ؟
-------------------
الطائر الحزين :)
عزيزى هو دخل عند صاحب المكان شخصيا زى ما ذكرت فى القصة و لو كان ينفع من وجهة نظره انه ياخد كورنر كان قاله كده ، الى بيشتغل فى المكان ده لازم يكون حيجر عليه عائد مادى انا مثلا نهايتى قربت هناك لو ما ظهرش حد يا خد دروس الفن الى بعلمه فى اقرب فرصة مهدددة انى امشى زى ما يكون فى اديا انا انى انزل الناس من بيوتها عشان يجوا هنا
و مين مش مثالى ما قتلتهوش المثالية
تحياتى
-----------------
tota-fm :)
زى عادتك زيارتك رقيقة و كلامك كله احساس
تحياتى
-------------
rain man :)
فاهمة قصدك ، للأسف احنا هنا فى مصر ما بنحسش بقيمة الفنان الى بنهمله الا لما بيموت للاسف الشديد
تحياتى
----------------
مصطفى السيد سمير :)
فعلا ربنا يكون فى عونهم
------------------
مصطفى رأفت :)
الحمد لله كويسة أنت أخبارك أيه ؟ الله ؟ أمال فين أبو لهب ؟
أكيد طبعا حتتهرى تريقة امال افتكرت ايه ؟
عارفة انك مستغرب على المدة الى اترسمت فيها الموناليزا بس دى المعلومة الى قالوهلنا و الله فى الكلية :)))
تحياتى
-----------------
sons egypt :)
و عليكم السلام
اه .. ما تقلبش عليا المواجع
تحياتى
-------------
أنين الحزن :)
ألف شكر على ذوقك و رقتك
منورانى دايما
عاليا لازم اتخيل زيت وسكر لانك بتقولى صندوق وشكله فى حاجه غاليه هو فيه اغلى من الزيت والسكر
صباح العندليب يا عاليا
والله مش عارفة اقول لك ايه؟
كنت اتمنى لو بإيدي اعرض لمثل هذا الرجل فعلا..
اللي يحزن ان صاحب الحلم يفضل يغزل في حلمه وفي الآخر يقولوا له مش عايزين النهاردة.. فوت علينا بكرة!.. انا فعلا زعلت.. مش عليه هو بس.. على كل صاحب حلم.. ربنا يسعده
وطالما عنده أمل.. ما يستعجلش.. وطالما تعب جدا.. هياخد مكافأة كبيرة إن شاء الله
تحياتي يا جميلة ..
صباح معطر بالورد والياسمين
انا عينى دمعت وانا بقرا ولا اعرف
لماذا ؟؟؟...........يمكن لتعاطفى
مع هذه الشخصيه اللى بقالها سنين بتجتهد فى عمل تحف فنيه بمنتهى الدقه
والحب وأخرجها فى أجمل الصور والتى صدمت
فى ان مثل هذا الفن والجمال محتاج لاشياء كتير فى زمنا هذا حتى يخرج للناس والفنانين ولم يشعر ان الزمن اختلف كتير
ام لانه ......رجل من زمن الحب
زمن الحب والرقى والرومانسيه فى العمل والفن والحياه والاخلاق
والتعاملات بين البشر والثقافه والمبادىء...التى تتجسد فى شخصيه
أبو العلا البشرى هذه الشخصيه الاسطوريه التى احببتها من قلبى منذ كنت صغيره ولكن الجزء الاول فقط من هذا الممسلسل
شىء جميل ياعاليا ان نقابل هذه الشخصيات ونسمتع فى الحديث معها ونستمع الى افكرها لنتعلم منها
ربنا يوفقه ويلاقى من يقدر فنه الراقى والجميل ويستطيع ان يظهره للنور .....لييتمتع كل متذوقى الفن الجميل به
شكرا على هذا البوست الممتع وانك عرفتينا على هذه الشخصيه الجميله
انسان من زمن الحب
تحياتى على اختيار اسم البوست وصورة البوست اختيار موفق جدا وممتاز
موضوع جيمل يا عليا وطريقه طرحك ليها اجمل
بجد المثاليه دى كانت زمان دلوقتى انتهت
بس هو اكيد هتضحك له الدنيا ومش هتقف عند هنا
صوت من مصر :)
اه فيه يا عم انت اغلى من الزيت و السكر ليس بالزيت و السكر وحده يحيا الأنسان
:D
-------------------
مروة جمعة :)
يا مساء العندليب و الورد يا جميل ، حمد الله ع السلامة
و لا انا و الله لحظتها بقيت عارفة اقوله موقف لا يحسد عليه فعلا
ربنا يعوضه و يلاقى حل فى مكان تانى
--------------------
نبضات :)
صباح عندليبى معطر برائحة الياسمين
هو فعلا رجل قادم من زمن الحب
مازال الامر فى عودة هذا الزمن بوهيميا
منورنانى دايما
---------------
sasa :)
ألف شكر يا درش و يا رب يكون فيه ذرة امل برجوع زمن المثالية تانى
عاليا تتصورى انى افتكرت القصة دى مش حقيقية وانها من وحى خيالك المهم ياجميل اعتقد انة فية حل لو حد من صحابنا اللى بيتعاملوا مع النت يومى يصور الشغل بتاع الراجل دة ويعرضة فأى موقع مزادات الموضوع مش بسيط وعاوز تسويق بس عشرين سنة فقطعة شل او عدد قليل مش شئ هين وبألتأكي هيلاقى اللى يشتريهم حاولى تقنعية النت وسيلة مضمونة الان للتسويق الجيد حاولى وانشاء اللة تنفع الفكرة او ممكن تعمليلة مدونة عليها صور الشغل وحكايات حصلت اثناء العمر الطويل اللى اشتغل فية فى القطع دى ونحاول ننشر المدونة او الموقع ونخلى مواقع تانية تستضيفة
تحياتى
لخروجى من زمن الأبيض و الأسود فجأة دون ان أستعد لزمن الألوان
كلمة رائعة من شعور أروع
يالهووووووي
يا بنتي انتي بتلاقي الناس دي ازاي
انا بصراحة نفسي اعيش في الجو ده
انا ممكن افكر اشتري منه العربية
علشان انا بحب الزمن ده وبابقى مش عاوز اطلع برة الفيلم بتاع شادية
هو انا ايه اللي جابني سنة 2008 فاجأة كدة!!
اعجبتني القصه
لكن هل النداء الاخير لابو العلا نفسه ام لمن هو هذ النداء؟
ابو العلا قصه كانت من اشهر قصص المسلسلات زمان زي ليالي الحلميه و يمكن اكتر شهره و كان الناس بيلتفوا حولها ايام رمضان في وقت الظهيره ايام ما رمضان كان بيجي في الصيف و كنا لسه صغار
كانت بتعجبني جدا
بجد انا مش مصدق مساله مبدا ونسيتى عبد الحليم والله انا هتجنن انا ليا اخت بتموت فغى عبد الحليم زيك والله يا عليا عارفه بنقولها اكتبى قصه حياته
انا مش لفت انتباهى فى القصة كلها غير معاملة المدير للراجل ... امال لو كان رايح يطلب منه حسنة كان عمل فيه ايه .. لا حول ولا قوة الا بالله
فيها ايه لو كان فهمه بالذوق وبطريقة كويسة
الكلمة الطيبة صدقة
ربنا يرحمنا
ويعطى هذا الرجل ما يستحق
معلومه جديده
أن دافنشى رسم الموناليزا فى أربعتاشر سنه
اشكرك على المعلومه دى
اما الرجل الفنان ده
بجد روح ابو العلا البشرى
تحياتى لكى
خالتك فرنسا
لا حول الله
الجميل انه لسه عنده امل وعنده خطه لبكرة
عنده هدف عايش له
وده احسن من اللي قفّل بدري بدري
الامل يا عاليا الامل
الامل لولاه عليا كنت في حبك ضحيه
تحياتي
ما هذا الاختفاء وما السبب فى عدم كتابة موضوعات جديدة وتنويرك لمدزنتى المتواضعة
يا عاليا
اتمنى يكون السبب خير
تحياتى
كلاكيت تانى و تانى :)
الحقيقة انا ما اعرفوش يا كلاكيت انا اتحايلت عليه اصلا عشان يوافق انشر حكايته او الموقف الى حصله قدامى ده و هو ما بيعرفش يستخدم النت اصلا و ما كانش فاهم يعنى مدونة أنا أديته لينك مدونتى دى و قلتله يبقى يدخل من عند اى حد من قرايبى و يقرا التعليقات ، و لأسف ما ختش منه نمرة تليفونه ، يا ريته يقرا تعليقك و يفكر فيه و يحاول يفهم عالن النت
تعليق رائع من مدونة اروع
الف شكر
---------------
big cod :)
هما الى بيجولى لوحدهم اصلا :))))) لعلمك و لا واحد من كتبت عنهم فى المبدعين فى الأرض دورت عليه كلهم جم لحد عندى و حكاياتهم شفتها قدامى
اه صحيح الى جابك فجأة 2007 كده ؟
---------------
ذو النون المصرى :)
يظهر انك ما قرأتش القصة كويس ، دى واقعة حدثت بالفعل صاحبها فكرنى بشخصية ابو العلا بتاعة المسلسل فلما ما رضيش اذكر اسمه الحقيقى شبهته بابو العلا اما النجاء الاخير فهو لصاحب القصة الحقيقى لانى اديته لينك المدونة عشان يدخل يقرا الموضوع و التعليقات
--------------------
صوت من مصر :)
لا ما تجننش و لا حاجة انا بحط اغنية تكون مناسبة لبوست مش شرط يكون عبد الحليم قبل كده حطيت اغنية لمحمد فوزى عادى
لا قول لاختك ما تكتبش قصة حياته عشان الورثة حيتعبوها و اولهم انا ؟ :)))))
------------------
قطة الصحراء :)
و انا زيك الحقيقة و ده الى بيغيظ كل الى شغال هناك مع ان المكان محقق بنشاطاته نجاح كبير لكن تقولى ايه باه الدماغ المصرية بتبوظ اى حاجة جميلة
--------------
فرنسا هانم :)
الله دى حاجة معورفة اوى يا خالتى
بس لأمانة هى الكتب اختلفت فيه اكتر من كده و فى قالوا اقل من كده بس عموما فى الحدود ... ناس كانت رايقة
--------------------
بنت القمر :)
فعلا الأمل ثم الأمل ثم الأمل من غيره يمكن كنت مت من زمان
-----------------------
مصطفى محمود :)
ألف شكر يا درش على السؤال انا مش مختفية و لا حاجة انا لسة جاية من مدونتك
خالص تحياتى
تحياتي
اولا اشكرك علي المعلومات التي اضفتيها الي...لم اكن اعرف شروط المعارض و اسعارها...
ثانيا...الزمن الجميل ولي...و اصبحنا في
زمن المعقول...و ربنا يستر علينا لان القادم هو زمن اللامعقول...
كنت اقول لاصدقائي ان من قبلنا استمتعوا بالحياة اكثر منا...لم يكن هناك زحام...و لا انحدار اخلاقي.. ولا
حتي الغلاء الفاحش هذا...حتي فقراء ذلك
العصر كانوا يجدوا من الرحمة نصيب في قلوب الباكوات و الباشوات...
تحياتي و تقديري ...
السلام عليكم ورحمة الله وبركاته
وحشتينى جدا جدا ووحشنى كتاباتك بشكل وحش
اولا انتى عامله ايه ايه اخبارك واخبار الناس الى قابلتيها قبل كده وتطور الحياه معاها
ان شاء الله نسمع عنه كل خير
الرجل دى مش سخريه منى ليه بس حسسنى ان هو طول العشرين سنه ما طلعش من بيته
ما ينفعش نقول ع الدنيا وحشه ياعاليه طبعا ساعات بيصادفنا مواقف تكرهنا فيها
بس بيكون العيب من اننا ما قدرناش نتعايش معاها او كنا حطنها فى صورة مثاليه مش ليها سعدت جدا بموضوعك
واعذرى تاخيرى
والسلام عليكم ورحمة الله وبركاته
كم من الحاجات القديمه اهلنا عليها التراب ودفناها بحجه المدنيه والتحضر
للاسف
في مقوله بتقول
OLD IS GOLD
ولكن على ما يبدو اننا نسينا ان القديم هو احنا
تحياتي
الغالية عاليا
أفضل شيء فعلتيه هو أنك واجهتيه بهذه الصراحة...القسوة قد تكون أحيانا أفضل من الخداع..
على الجانب المشرق...جميل أن تلتقي هذا الحالم...جميل أن تعود إليك ولو لثوان ثقتك بأن كوكب الأرض مازال مأهولا
سامحيني على طول الغياب
الربان :)
أزيك يا صديقى السواح ؟
العفو يا سيدى اى خدمة
فعلا انا برده سمعت حكايات حلوة اوى و مواقف جميلة من واحدة اصلها بنت باشوات احنا فعلا زمانا باه ممل و سخيف جدا جدا
دمت بود
-------------
مؤمنة :)
و انتى كمان وحشتينى و افتقدت تعليقاتك بس بقول اكيد مشغولة لان مش عوايدك انا الحمد لله بخير و كويسة
لا و الله يا مؤمنة هو خرج و لف و انتهى بيه المطاف فى المكان ده ، خرج من بيته يعنى و عارف بس هو اتصدم لان الى سمعه من الناس عن المكان و لطف و كرم صاحبه غير الى لقاه خااااااااالص
و عليكم السلام و رحمة الله و بركاته
----------------
أسكندرانى اوى :)
أيوة كده يا ابو اسكندر ارجع نورنى تانى انا يا راجل انت ما اقدرش استغنى ابدا عن تعليقات و شيل البوست البايخ الى عندك ده من فضلك بلا الى اللقاء بلا بتاع انا مستنية البوست الجديد و يكون سكندرى اوى كالعادة
شكرا على المقولة دى
بس مش كل الناس زيك فاكرة ان القديم هو احنا معتبرينه يا سيدى كان عصر الاستعباد و الجهل و قلة الامكانيات و كده طب ما الامكانيت كتيرة دلوقتى اهى عملنا بيها ايه حد قادر يقربها و لا يستعملها؟
------------------
الكونتيسة الحافية :)
لا لا بجد ده كتير الاسكندرانية كلهم رجعوا نورونى تانى .. جنابك كنتى مختفية فين ؟ حمد الله على السلامة
يعنى و الله حسيت برده انى قسيت عليه شوية بس خفت عليه يتصدم لما يدخل يقابل صاحب المكان
و هو فعلا زى ما بتقولى كده رغم انه صعب ليه و نموذج نادر لكنه ادالى امل ان لسة فيه ناس كده فى الدنيا
خالص تحياتى
أبو العلا البشرى
كان مسلسل عبقرى ، وكنت أحس أنى الويد اللى فاهمه من أهلى
كانوا شايفينه كمسلسل وخلاص ، وأنا كنت أفهم ما وراءه ... أو هكذا كنت أعتقد
----
فيه ناس طيبين فعلا كده
ولأن الناس دى طيبة ، شايفة الناس طيبة
فيصدق القول "كل إناء بما فيه ينضح"
وأقول "إنما ترى الدنيا بلون عينيك"
------------------
تحياتى
عاليا
-------
دروس فن إيه اللى بتديها؟؟
--------
arabic-id :)
نفس الى حصل معايا ايام اذاعته برده و اثر فيا اوى مع انى كنت صغيرة جدا و قتها يعنى بس مش عارفة اتعلقت بيه ليه
بادى دروس كروشيه
Post a Comment