يا حلمي المستلقى فوق كَتِفَك
يا إبتساماتى المولودة من أطراف نجمك
يا أحضاني الموءودة فى صدرك
يا راحتي المغيبة
و سعادتي المعاقبة
و قلبي المنفي
منذ أبد الأبدين
يا عيون الأساطير تداعبني
حطم زنزانة الآهات و أنشاني
إنزعني من ظلمة الوحدة انزعني
و إهزمنى فى سباق العمر
و حاوطني بحنانك
ألحان الحب كلامك
أنفاس الورد سلامك
أحبك
ماذا لو قلت أحبك ؟
لماذا يحتكر الرجال كل شئ
حتى الحب
لماذا أتضرر موتا
أثر قانون البطولة الشرقية
لي دم ، و لحم ، و عظام مثلك
لي قلب ، و شرايين
تضخ فيها الأشواق
تفزعنى كل ليلة مستجدية
أحبك
منذ رأيتك فى لوحاتي نطفة سريالية
أحبك
منذ لمستك فى قنينتي عطور سحرية
فأفسح لي مكان في هامش حياتك
أجعله قصري
و مفترق طرق ملل أستنفذتنى
هامش
لا أطلب أكثر من هامش
أحبك .. ماذا لو قلت أحبك ؟
54 comments:
فأفسح لى مكان فى هامش حياتك
أجعله قصرى
و مفترق طرق ملل أستنفذتنى
هامش
لا أطلب اكثر من هامش
احبك .. ماذا لو قلت أحبك
عاليا
بجد جامده جدا تسلم ايديكي ياقمر
اول تعليق واخد بالك انت
سلامووووووووز ياعسل
وزة
جميل
لا جناح عليك فيما أكننت فى نفسك
وان الحياه على الهامش أو مجرد هامش هو قمة العطاء ووضع الأخر فى مأزق الود
وتحمل مسئوليتة وقمة الذكاء فى أن الهامش سيأتى له يوما أن يأخذ كامل الصفحات وكل كتاب العمر
تحياتى
ألحان الحب كلامك
أنفاس الورد أشعارك
فستانى الأحمر يبكى فى انتظارك
اي ملاك اوحى لكي بتلك الكلمات؟؟؟؟؟؟
عيون الأساطير تداعبنى
و ذراع الحريرتطوقنى
دعنى أنعم بالوهم
و لو لحظات
جميل جدا يا عليا مشاء الله
والله الواحد بيستنى البوست بتاعك بأستمرار
تحياتى
بجد احساسك عالى اوى مش هقدر غير انى انزلك القبعه زى الامريكان زمان قصدى الايس كاب
المنقذ
الكلام بجد رائع و صادق اوى..و كلامك مع الجو العندليبى اللى فى المدونة عامل شغل جامد..دا حتى عند التعليق قولى حاجة...بجد عاجبانى جدا دقتك ان يفضل الجو واحد فى كل المدونة و الاغنية تجنن مع انى انا اللى حتجنن عشان مش عارفة احط اغنية كدا عندى...المهم البوست فعلا حلو اوى اوى اوىىىىىىىىىى
الله على الكلمات الرائعة الرقيقة
اللى طالعة من قلب دايب فى الحب
غالبا مش شرط تقولى بحبك بالكلام
ممكن تقوليها بالاحساس
بالتصرفات
بالاهتمام
بالقلب اللى دايب دا
ولو محسش بصراحة المفروض يروح ينتحر لانه غالبا لو محسش هيكون معندوش قلب انه ميحسش كل الرقة والرومانسية المتدفقة دى
تحياتى يا قمر
الله الله بجد كلماتك جميله جدا
كالعاده مبدعه يا عاليا
تحياتي وسلامي
لا أطلب اكثر من هامش
الطمع في الحب احسن من القناعة
انها فرصة المرء الوحيده ليكون طماع وضميره مستريح
تحياتي
الحب تلك الكلمة السحرية التى بها نحيا وبدونها ينتحر قلب
عزيزتى تحياتى
ويبقى الحب
أنين الحزن :)
شكرا على كلامك الجميل ايوة واخدة بالى تامرى بايه يا ستى و انا اعملهولك على طول
سلامووووووووووز
-----------------
الطائر الحزين :)
صديقى العزيز بجد الصادق دائما بعيد عن اى تكلف و مجاملة
(لا جناح عليك فيما أكننت فى نفسك)
جملتك دى عاملة زى كريم كده رطب لسعتى
تحياتى
----------------
أسكندرانى :)
ما فيش زيه بين الملايكة و لا البنى أدمين هو حاجة كده خرافية سمعت عنها فى الحواديت زمان
-----------------
sasa :)
جبرتى التدوين بيستنى موضوعاتى ؟ المهم بس اكون دايما عند حسن ظنك
-------------
سلطان الغرام :)
يا عم يا عم على الأسامى و المزاج العالى اهلا اهلا منور نى و الله و احب اشوفك هنا دايما انا لسة راجعة من مدونتك حلوة زى اسمك
متشكرة اوى على الكرم ده و الذوق الامريكانى العالى
دينا :)
أهلا يا دبينا لسة راجعة برده من مدونتك جميلة حقيقى
و اشكرك على كلامك الجميل ده عن مدونتى و حدخل عندك مرة تانية ان شاء بكرة و لا بعده احطلك فى التعليقات كود تشغلى منه الاغانى .. أى خدمة يا ستى
--------------------
حدوتة :)
اخص عليكى يا حدوتى ينتحر ايه ؟ بعد الشر عليه
----------------
رالك يور مايندز :)
شكرا يا راك دايما بتحرجنى بذوقك
--------------------
أنيوموس :)
لا انا مش معاك سيد مكاوى بيقول ( خلى شوية عليا و خلى شوية عليك ) :))))))
--------------
قطة الصحراء :)
و يبقى الحب
منورانى دايما
أسلوبك جميل جدا
ولو انت نفس البنت اللى بتكتب فى كلمتنا يبقى احنا سعداء الحظ
أحمد خيرالدين
بأكتب باسم احمد خيرالدين
و الله يا عاليا كلك ذوق و كفاح
مرسى يا رقيقة
غير جميل وموهبة عظيمة والكلام الكتير دة كله اللى لازم يقال
هناك تشبيه اعجبنى بشدةوهو"نطفةسيريالية"
ويهيىء لى انه مستوحى من طبيعة عملك
فنانة بقى وجديد غير مستهلك
لكن عندى ملحوظة فى كلمة أبد الأبدين
المفروض انها تكون
أبد الآبدين
وذلك على حد علمى
لكن راااااااااااااائع
تحياتى
اقولك غير عشره على عشره مع مرتبه الشرف يا استاذه بجد لو بايدى اقول عليكى فعلا عندليب الشعر التدوينى
عاليا
ماذا لو قلت انى احبك
ماذا لو قلت انى مبهورة باسلوبك
ماذا لو قلت انى ساداوم على زيارة مدونتك
ماذا لو قلت انى احترمك
ماذا لو قلت انى اقدرك
على فكرة دى اول زيارة لمدونتك الحالمة دى كفاية انها بتفكرنى بحليم حبيب قلبى
على فكرة انا زورت بلوج اهل عندلبيات
حلو اوى نفسى اكون واحدة منهم
مبسوطة جدا بمعرفة مدونتك اللى خلتنى اعرفك اكتر
دومتى بكل خير
نوراى
عزيزتى
دائما متألقة ومتألمة
ماذا لو قولتى له أحبك
قوليها لو احسستى بحبه
لاكن اعترافك ده يايبعدك قووووووووووى عنه يا يقربك جدا منه تتحملى النتائج
عارفة الرجل الشرقى ليه يحتكر الاعتراف بالحب
علشان الرجل لما يعلن حبه لامراه وترفضه يتقبل ذلك ويتالم ولا يحس باهانة تمس كرامته
لاكن المراه لو اعترفت بحبها لرجل فرفضه لها بالنسبالها جرح لكبريائها وكرامتها
هل تقدرى ان تتغلبى على الشعور بالاهانة لو اعترفتى وتم رفض مشاعرك
ال يا الكتير الاولانية جميلة حسستنى انه شئ جميل وعظيم بالنسبالك يمكن مستحيل
والجملة الاخيرة
فأفسح لى مكان فى هامش حياتك
حسستنى انك بتاكدى ان الرجل بالنسبة للمراه كل حياتها
والمراه عارفة انها مهما هتكون لرجل هتكون جزئ فقط من حياته
وانتى قبلة وراضية تكون اصغر جزئ
مشاعر جميلة وكلام جميل
تحياتى
سلانم
السلام عليكم ورحمة الله وبركاته
كلمات جميله وكبيره اوى يا عاليا
ماذا لو قلت احبك
خليها فى سرك احسن فى سرك انتى ملكة نفسك اما فى العلانيه فالناس هم من نفسك
حقيقه
واعتبريها نصيحه من اخت بتحبك اوى ومشاعرك دى جميله ويبقى انسان الى يقدرها
بتسعهدينا يا حبيبتى دايما ببوستاتك والى الامام دوما
والسلام عليكم ورحمة الله وبركاته
ولا حاجة
قولي
مادام ليكي قلب
ولسان
ولهفة
اكسري كل القوانين
ولا تكتفي بأي هامش
احنا :)
أهلا بجيران شارع الصحافة دخلت مدونتك و سعدت بالتعرف عليها و قرات قبل كده موضوعك بتاع عيد الحب عجبنى جدا و مقيدة و جهة نظرك
ربنا يوفقك
نورتنى
---------------
دينا :)
انت الى ذوق يا ذوق و لا ميرسى على واجب
------------
مصطفى محمود :)
أشكرك على الكلام الجميل ده ن و أه باه الدراسة و الميول انت عارف لازم تسيب بصمتها مع الواحد
شكرا ع الملحوظة الكى بورد اصلها ساعات بتخرف
الف شكر
--------------
صوت من مصر :)
براحة يا عم عليا الكلام الكبير ده ؟
كلك ذوق و الله و اتمنى بس انى اكون دايما عند حسن ظنك
-----------------
نوارى :)
يا اهلا يا اهلا بالزائرة الجديدة
كل ده من اول مرة كده ؟ اشكرك بشدة بس اتمنى تكون من القلب و بعيد تماما عن المجاملة لانى ما بحبش المجاملات
و طبعا اهل عندليبيات تتشرف بيكى و احب اشوفك هنا على طول ان شاء الله
----------------
احساس لسة حى :)
عشان كل الى انت بتقوله ده انا بكتفى انى اكلم نفسى فى قصيدة زى دى انما الدنيا عمرها ما حتسمحلى انفذها انتوا بس استمتعوا بساديتكوا و انانيتكوا و خلولنا احنا العذاب
اما بالنسبة لانى راضية بالهامش لان ده انسان مختلف جداااااااااا الهامش معاه حيبقى دنيتى الى طول عمرى بحلم بيها لو حد تانى ما كنتش حقول الجملة دى غير انه ليه ظروفه الى تجبره على كده مش انانية منه زى اغلبكم
---------------
مؤمنة :)
و عليكم السلام و رحمة الله و بركاته ازيك يا حبيبتى عاملة ايه اطمنى ما تخافيش انا بافضفض مع الورقة و القلم بس
---------------
مصطفى السيد سمير :)
تفتكر يا درش ؟ أقرا تعليق احساس لسة حى حتعرف المشكلة
---------------
السلام عليكم
ما اجمل الحب عندما يوكن واقعيا وليس وهما
لاننا لو تخيلنا الحب وهما في خيالنا وتركنا هذا الوهم يكبر بداخلنا من الممكن ان نفيق علي وهم اكبر من الحب بكثير
ولا ادري لما دائما تظلمون الرجال في كل شئ وتعتقدون انهم مسيطرون علي كل شئ حتي في الحب
عزيزتى
احنا نستمتع بسيادتنا
وانتم استمتعوا بعذبنا وخوفنا من عرض مشاعرنا واحتمال رفضها
كتير قوى بيتوجع راجل من رفض مشاعره بس مش بيبين وبيخبى
انتى عارفه انا بحب اغنية انا مقبلش اكون انسان على الهامش جدااا
كونى كل حاجة فى حياة انسان عادى
احسن من تكونى جزئ بسيط فى حياة انسان مختلف ومميز
ولو ظروفة انتى مقدراها وعذراه فيها
ده يخليكى تحترمية وتسمحيه فى مشاعرة
بس ميخلكيش تتنازلى عن حق قلبك واحساسك وروحك
الاحساس مش بيكتفى يكون على الهامش ولو استحمل فترة صغيرة لو طولت الفتره دى هيتعب الاحساس وستخنق
طبعا اغلبكم دى مش ليه
تحياتى يا افندم
سلام
تقولين:
لى دم ، و لحم ، و عظام مثلك
لى قلب ، و شرايين
تضخ فيها الأشواق
-----------------------------
وأفسرها
بى عشق وأمل وحنان
لى شوق وعمر يذوى
-------------------
تحياتى عاليا
أنت الرائعة
لا تعليق
سيمفونيه بجد ياعاليا تعزفيها بمشاعرك الرقيقه وقلبك الكبير وفيها معانى ورموز كتيره بجد نفسى شخصيه معينه تقرائها
ماذا لو قلت احبك ؟ ......منتهى الحب واختيارك حتى لهامش حياته ولفستان الاحمر وصورة البوست رموز كتير اعرف جيد معناها بصراحه دا اكتر بوست حبيته ليكى رغم بوستاتك الرائعه السابقه بس البوست دا بجد من اعماق قلبك الذى اسمع صوت نبضاته وانا اقراء كلمات قصيدتك هذه القصيده المعبره فعلا عن موضوع القصيده بكل دقه ههههههههههههههههه
واخده بالك دا تهريج مش اكتر مش قادره امنع نفسى من كتر ما القصيده معبره جدااااااااااااااااااا
عشان بس مش تقتلنى لما تشفونى
فى حب فى الدنيا اكتر مما عبرتى عنه فى قصيدتك ؟ اعتقد مافيش لانها منتهى الحب
ميعادنا السبت الساعه 11 وان شاء الله ومش حتاخر زى كل مره ...وحشتنى
تحياتى على هذا البوست الرائع
بجد كلاماتك كلها جميله وروعه
احساسك عالى قوى فيها
واتمنى لو يعلم الحبيب كم حبيبه يحبه ويتمنى له السعاده
ليرق قلبه ويشعر بيه
تحياتى ولاء
قولي أحبك كما شئتي
ولكن لمن يستحق
والسؤال هو
ترى من يستحق ؟
كلمات جميله
أحسنت
تحياااااااتي
ماذا لو قلتي أحبك؟؟
لا شئ سوى صدى الكلمة المحببة على لساني
لتسمعيها مني انا !!
ماذا لو قلتيها ؟؟
لا شئ سوى السعادة اللانهائية
قوليها ولا تخشين
جامدة يا عندليبة
ايه الرومانسية دي كلها
sons egypt :)
ما اجمل الحب عندما يكون واقعيا لكن من حرمت الدنيا عليه حبه له رأى اخر
مش ظالمنيكوا و لا حاجة دى حقيقة انت لو بتحب مش حتروح تقول على طول ؟ قولى كده ايه اى حيمنعك
تحياتى
----------------
أحساس لسة حى :)
(استمتعوا بعذبنا وخوفنا من عرض مشاعرنا واحتمال رفضها) جملتك دى يا عزيزى شفتها مرة فى فيلم معبودة الجماهير لعبد الحليم حافظ لكن فى ارض الواقع اعتقد انك يا اما بتبالغ يا اما اتصالحت مع عبد الحليم :)))))
ما فيش راجل بتفرق معاه خصوصا فى زمن البنات الى قاعدين من غير جواز كتير
(كونى كل حاجة فى حياة انسان عادى
احسن من تكونى جزئ بسيط فى حياة انسان مختلف ومميز) الجملة دى مع احترامى انا ضدها تماما
اقرا تعليق الطائر الحزين
الى عايشن مع ناس عادية عملتلهم ايه الناس العادية ؟ حياة مملة اسخف من روتين الموظفين و بيرجعوا يلعنوا اليوم الى اجوزوا فيه لحظة مع انسان نادر الوجود و مميز بكل المقاييس صدقنى بالدنيا كلها و يمكن يجى عليك يوم تجرب و تقول عاليا قالتلى
و اه الجملة الاخيرة مش ليك د انت احساس برده و لسة حى كمان
تحياتى
----------------
arabic -id :)
لى شوق وعمر يذوى
عمر يذوى
عمر يذوى
و الله انت الى رائع
-------------
نبضات :)
كل الى انتى كتباه ده ولا تعليق ؟؟؟ ما علينا :)))
اه و انا كمان نفسى شخصية معينة تقراها برده .. ايوة الصورة و الفستان الاحمر ... سيحى كمان ما تسيحى :))))
شكرا على كلامك الجميل و شماعرك الرقيقة دائما الى مش عارفة من غيرها حياتى كانت حتبقى عاملة ازاى يا انتمتى
ميعادنا زى ما هو ان شاء الله
تحياتى يا نبضات حياتى :)
-------------------
ولاء :)
انتى الى أحساسك دايما عالى و انا كمان اتمنى و الله
هههههههههههه
منورانى :)
----------------
سلوى :)
يستحق بالثلث
شكرا الف شكر على احساسك الجميل
تحياتى
----------------
big cod :)
فهماك ، رأيك و أن كان به الأمل قليلا لكن لاسف عارفة انه ما ينفعش فى دنيتنا و عالمنا
تحياتى
عزيزتى
شوفى يا قمر
انا متصالح مع عبد الحليم وبحبه قوى بس مش زيك انا حبى لاى حد مش بيعمينى عن عيوبه
عجبك كده دخلنا فى عبد الحليم تانى عديها
انا مش واخد بالى انها جملة متشابهه مع جملة فى فليم معبودة الجماهير مع انى اتفرجت عليه كتير بس باين من كتر الفرجه على الفليم مبقتش اركز مع جمله
وانا مش ببالغ وعارف الزمن ده زمن متعب على اى امراه وفى مشكلة كبيرة اسمها العنوسة والجواز
بس زمن يقهر اى راجل برضوا علشان الرجل مفروض وملتزم بحاجات كتيرة
والتزامات دى موجوده فى وجدانه وروحه ومهما الزمن اتغير هيفضل ملتزم بيها
وانتى شايفه برضوا العنوسة بقيت على الرجالة والستات زى بعض بس يمكن الرجل الوقت فى صاله شويه
قبل ما اقرئ تعليق الطائر الحزين
هقولك انتى فهمتينى غلط قولى ليه
اللى عايشة مع ناس عادية رروتين اه يلعنوا اليوم اللى اتجوزوا فيه يمكن بس نسيتى انا بقول انسان عادى بيحبك
هتشوفى روتينه حياة
هتشوفى الموظف ده احسن واحلى من تامر حسنى
ولو لعن الجواز يوم هيحمد ربنا انه اداكى ليه هدية الف يوم
المهم انه بيحبك صدقينى
المهم انك بالنسباله كل النساء
عارفه وجود الانسان مع حد مميز شئ جميل بس لو انا مميز بالنسباله ايضا
واكيد وجودى معاه هيكون اكبر ملل وزعل لما يطول قربه منه والقرب ده ما اصبح اندماج وارتباط
ده راى
واشوف الطائر قال ايه
سلاام
الحقيفة مش عارف اعلق رائعةبجد
عاليا ابعتليلي الماسنحراو الهوت بتاعك ع الميل لوممكن
اعتقد بعد كل الكومنتات دي مش محتاجة رأيي
بس لازم اقول ان كالعادة رائع ومش محتاج اتكلم عن الاحساس العالي
تحياتي
تحياتي
مشاعر دافئة صادقة، وجود هامش يعني وجودك و يعني شعوره هو بهذا الوجود.
ربنا يسعدك.
تحياتي و تقديري
صباح العندليب يا لولو
جميلة جدا وعميقة بشكل مؤثر
بس ليه هوامش يا حبيبتي؟.. ليه؟
يعني الواحدة مننا تصبر تصبر وتفطر على هامش!.. :)).. بجد فعلا عندليبيات..
بلديات العندليب تحييكِ وتقدم لك خالص الحب :)
صباحك ورد
عاليا
اولا لكي جزيل الشكر على المجهود الجبار اللي عملاه في البوست السابق..ابو العلا البشري.زرجعتينا لأيام حلوة وجميلة وقلبتي علينا المواجع وبصرف النظر عن الموضوع انتي اخترتي فنان له مني قدر كبير جدا من الحب والاحترام لاختياره الموفق في كل اعماله وعلى رأسهم فيلم شئ من الخوف الذي أحفظه عن ظهر قلب كل مايجي دايما أسبق الحوار الفيلم ده كنت مسجله وانا صغير على شريط كاسيت كنت احب دايما اسمعه كده بالليل قبل ما انام كان الحوار على فكرة فيه لعبدالرحمن الابنودي كان دائما عظيم محمود مرسي فنان صعب تلاقي منه اتنين
أما بخصوص هذا البوست المتأجج
احط خط تحت لماذا يحتكر الرجال كل شئ
حتى الحب.مش عارف مش قادر أهضمها ياريت تبقي تشرحيهاأكتر من كده لان ربما انتي تقصدي اتجاه تاني خالص وخانك التعبير وان لم يخنكي التعبير فده معناه انك بتلغي حاجات كتير في الأنثى
عجبني قوي تعبير
منذ رأيتك فى لوحاتى نطفة سريالية
دي عاليه قوي قوي ولها مدلول عميق جدا
جاء لفظ نطفة يعطي أمد بعيد جداً في الماضي
ثم جاء التوصيف لها بأنها سريالية أروع واروع فرغم سريالياتها وغرابتها الامعقوليه لكي يتعرف عليها أحد فلقد تعرفتي عليها وعرفتي مكنونها رغم سريالية الشكل إلا انك رأيتك ذاتها التي تختبئ في سريالياتها
تسلمي
احساس لسة حى :)
خلاص باه انا تعبانة انت عندك حق و انا محترمة وجهة نظرك بس انت عارف الحب اعمى
انا اقصد انى جملتك شفتها يعنى فعلا بما تمله من معى فى الفيلم مش الجملة هى حرفيا
تحياتى
-----------------
كلاكيت تانى و تانى :)
كفاية تشريفك ليا
حاضر
----------------
مندهش :)
فيه ناس كده على فكرة مرة على مرة حتخلينى اتغر فى نفسى بكلامها براحة عليا شوية يا متر
------------------
الربان :)
اجمل ما تعليقك دعوتك الى لطفتك من حزنى شوية
------------------
مروة جمعة :)
مساء الورد يا ورد
انا عارفة يا بنتى هماش ايه صحيح ؟ الواحد بينه حيبتدى يخرف
-------------------
حسن أرابيسك :)
كنت فين يا أبو على حمد الله ع السلامة
طبعا الفنان محمود مرسى عزيز على قلب ناس كتير و فيلم شئ من الخوف ده من التحف كفاية صوت شادية على الحان بليغ حمدى و كلمات عبد الرحمن الأبنودى تصدق كنت فاكرة انا بس الى ممكن اسجل فيلم على شريط و اسمعه ؟ أصلى عملت كده مع فيلم غزل البنات و بالذات المشهد الاخير الى يوسف وهبى بيواجه نجيب الريحانى بحبه ليلى .. ياااااااااااااه
تحف مش حتتعوض فعلا
----بالنسبة لجملة اخشى فى البداية انها تكو زعلتك انا ما اقصدش حاجة و الله اصلى صعبان عليا نفسى فى ظروف خاصة بيا انا الراجل عايش قدامى بحريته لو مخنوق مثلا ممكن يروح يقابل واحد صاحبه او يعد لوحده على النيل بيحب بيقول انه بيحب ما فيش حكر على مشاعره ما حدش حيقله عيب ازاى تقولى كده الى خلاك تقولى كده يبقى ممكن تتجرا و تقول كده لغيرى ، عايز يشتغل بيدور على شغل من غير ما حد يقوله مش محتاجين منك حاجة غضبان فى البيت بيسيب البيت شوية من غير ما حد يقوله عيب تسيب بيتك ما يصحش ، و هكذا فهمتنى ؟ و الى بقوله ده من اوائل اسباب تعطيل احلامى و مشاعرى لحد دلوقتى قربت على سن التلاتين و ما عملتش حاجة حتى شغلتنى مش شغلانة اصلا و مش مقتنعة بيها لكن بيقولوا كويسة للبنت عشان ما فيهاش احتكاك كتير بالرجالة هى دى كل ميزتها و المميزات الى انا حرتاح لها فى داهية ما يهمش
انا مخنوقة .. مخنوقة
فهمتنى ؟
أسفة للأطالة
حسن أرابيسك :)
أشكرك جدا على شرحك المستفيض لجملة منذ ان رأيتك فى نطفة سيريالية
و الله لو مش متأكدة كنت قلت أنت سمعت مشاعرى و هى بتكلمنى
انت رهيب و الله
و ليا عندك خدمة انا حط قصيدة لم يكن نغم تانى لو تفتكرها لانى شلتها عشان انشرها فى المجلة و هما شارطين عليا ما اديلهومش حاجة ظاهرة على النت و بلفتة غباء منى مسحت التعليقات مع البوست( غبية معلش ) انا فاكرة كده كام تعليق على الماشى المهم تعليقك كان اكتر عليقك عاجبنى ساعتها انت كنت كاتب استرسال شعرى لكلامى بيبتدى ب .. حين وجدتك أصبحت قانعة ب .... ) مش فاكرة باه الباقى و النبى لما انشرها اكتبلى التعليق تانى ارجوك
عاليا
تحياتي
تعقيباً على تعقيبك
مش بقولك انتي كده بتشرحي حته تانيه خاصة بالرجال أو بالولد بمعنى أصح
ولكن كان تعليقي على خاصية ان احتكار الرجال حتى للحب
بس عشان يبقى في تحديد مواقف
وبخصوص المجله ربنا يوفقك
وتاني مرة ما تلغيش بوسط انتي بس اعملي فيه اي حاجه وبعدين اضغطي مفتاح درافت وبكده يكون البوست موجود لكن مش ظاهر
وبخصوص اعادة نشرك للقصيدة واللهي أنا مش فاكر الصبح فطرت ايه
وبعدين الحاجه اللي بتطلع في لحظتها كده بفطرتها بتبقى احلى من اي لحظة استعداد وتجهيز
وربنا يوفقك
وعسى أن تكرهوا شيئاً وهو خير لكم
وعسى أن تحبوا شيئاً وهو شرُُ لكم
صدق الله العظيم
شكرا يا حسن
كلامك جميل اوى و الله ما بجامل انت انسان جميل و فنان فعلا
عزيزتى
عارفة انا مشكلتى انى مش بفوت كلمة ولازم استفسر عليها
بجد قوليلى هو ده شئ يخنق ولازم افوت كلام واعدى كلام واتجاهل كلام
خلاص باه انا تعبانه
مالك بس التعب ورا كل الناس صدقينى ومفيش حد مرتاح فى الدنيا وبكره هتفرج
وخلاص باه علشان خاطرك
وعارف ان الحب اعمى بس يا ريت ما يفضلش اعمى للابد ساعات يكون كويس انه يكون اعمى بعض الوقت لاكن لو اعمى كل الوقت صعب اوى
سلام
أحساس لسة حى :)
يا حسام انا ما اقصدش حاجة انا نفسيا تعبانة اليومين دول
مش عيب فيك و لا حاجة ما تفوتش حاجة تفوت ليه؟ انا بحترم ده فيك على فكرة و تعليقاتك دايما من اول التعليقات الى ببص عليها عشان تبقى عارف لانى عارفة انك صادق مش بتجامل و لا بتكتب اكلشيهات مكررة عشان اروح اعلق عندك و خلاص
اطمن انا مش مضابقة منك انت انا بس صعبان عليا نفسى و حاسة ان محدش حاسس بيا و بتحاسب من ناس المفروض انهم اقرب الاقربين ليافى عالم الواقع زى ما كون اجرمت مش كرمت انسان بحبى ليه عشان كده صعبان ليا
فهمتنى ؟
مش عايزة باه اخش فى تفاصيل شخصة اكتر من كده الكل بيقرا التعليقات دى انت عارف
سلام يا كابتن
تحفة ياعاليا ماشاء الله عليكى
ماذا لو قلت أحبك ؟
لماذا يحتكر الرجال كل شئ
حتى الحب
لماذا اتضرر موتا
أثر قانون البطولة الشرقية
هههههههههه
صدقينى انتم بقيتم مالكين كل حاجة فى ظل سوزى
احنا اللى علينا الدور نتضرر صدقينى
تحياتى
عزيزتى
صدقينى من غير تفاصيل شخصية واى كلام انا حاسس بحاجات كتير بتمرى بيها
اصل مش لازم تفاصيل علشان افهم
والصراع اللى انتى فيه جواكى والاحساس اللى انتى حساه يمكن مريت بيه
احساس ان محدش فاهمك خالص ولا حاسس باللى جواكى ولا فاهم ايه جواكى مريت بيه كتير
وحتى الحب اللى يعتبر شبه مستحيل وصعب يكتمل بالارتباط والاندماج مريت بيه وعيشته ولسه جوايا منه بقية
ومكنش الحساب من ناس الحساب كان بينى وبين نفسى وبقول عيش الواقع بقه وبطل عبط وغباء بس مين اللى يسمع القلب ده مفيش شئ ولا اطار يقدر يحكمه
لاكن على الاقل نقدر نلجمه شويه ونحجم مشاعرنا علشان نعيش الواقع ونقدر نكمل فى الدنيا ونتعايش فيها
واكيد اقرب الناس لينا شايفين حاجات مش شيقتها ولازم نفكر فى ارائهم ونعيد حسابتنا كل شوية
انتى اللى قولتى الحب اعمى
وربنا يريح بالك وقلبك وروحك دنيا واخره
مش لازم تعلقى على كلامى ده لو حبيتى
اوك يا جميل
سلام
السلام عليكم
كلمات جميله شفافه في قمه الجمال والرقي
الفكره أعجبتني جداً فأنا لا أعرف لماذا يجب على المرأه أن لا تعترف بحبها ومن أوجب عليها ذلك .
أنا عارف إني مقصر معاكي جداً في المرور وفي السؤال بس فعلاً الفترة اللي فاتت ماكنتش بأدخل النت كتير وفيه ناس كتير مقصر معاهم .
أرجوا أن تقبلي إعتذاري وإن شاء الله الفترة القادمه أكون متواجد بإستمرار
خالص تحياتي
فين الحب اللي زي ده بس؟
كلماتك جميلة اوي ياعاليا
احساسها جميل جدا وكلماتك صادرة من قلبك فعلا
تجياتي لكي
محمد سمير
مدحت محمد :)
أهلا يا مدحت منورنى
احب اشوفك هنا دايما
باه كده يعنى انت شايف ان احنا ملكنا كل حاجة ؟!!!!! سوزى يا مدحت هى ملكت كل حاجة بس بنات مصر ملكوا ايه
سعيدة جدا ان كلمتى تعجبك من اول زيارة و ارجوا انها تكون خالية من المجاملة
تحياتى
-----------------
أحساس لسة حى :)
ما اردش ازاى اوعى تقول كدة تانى انا حلاقى فين حد يهتم بزعلى و يطمن اذا كنت موهومة و لا لا من غير اى ساب قمعرفة او انتظارا لمصلحة انا ابقى جاحدة لو ما ردتش عليك
و اشكر ك بجد على اهتمامك الشديد و ادام الله صداقتنا
--------------------
علاء سلام :)
و عليكم السلام و رحمة الله و بركاته
الله اكبر يا ريت كل الرجالة رايهم زيك كده يا اخى كككككككككككككانت الحياة بقت اسهل
و الاعتذار مقبول ربنا يعينك على مشاغلك
تحياتى
-----------------
shah :)
مولاى
موجود هنا اهوه ، فين الى فى بالى يجى يقرا تعليق الأمراء و يتعلم من طريقة حكمهم
---------------
غمض عنيك :)
شكرا يا باشا ع الكلام الجميل
احنا فينا من مسح التعليقات
مااااااشي
احنا فينا من مسح التعليقات
مااااااشي
أسكندرانى أوى :)
انا ما مسحتش حاجة و الله تعليقك موجود زى ما هو اهوه منور البلوج و زايد نورها فوق نور حليم نفسه و رديت عليه
ايه الحكاية دى باه ؟
Post a Comment