فى احدى روائع ( حسن لأمام ) فيلم ( السكرية ) مشهد يظهر فيه ياسين ( عبد المنعم ابراهيم ) يسير خلف عائشة( هدى سلطان ) التى ترتدى البيشة و الملاية اللف أى لا يظهر من مفاتنها شء و مع ذلك ينطلق فى مغازلاتها مبدعا متالقا ( يا حلو يا أبيض .. ادينى أطة ) فتدير له و جهها مستعدة لرفع الشبشب و ترفع البيشة ليفاجأ بانها شقيقته !!!!!!!!!!!!!!!!!
ه . ن : 28 سنة ، خريجة جامعة تبحث عن عمل
كنت راكبة مرة ميكروباص طلع قعد حنبى راجل كبير شكله يدى حوالى 45 سنة فى الحدود دى لزق فيا اوى فقلتله من فضلك أداخر شوية
الرجل : ( بصلى بأستنكار و قالى ) : عشان الى حيطلع يعد دلوقتى انا بوسع لاس مكان
طلعت فعدت جنبه واحدة ست ، راح لازق فيا اكتر و أكتر و فتح رجليه الأتنين على البحرى بحيث بقت كل رجل على رجل واحدة فينا
قلتله : لو سمحت أعد حضرتك على الحرف و خلى المدام تيجى تعد جنبى أنا مش عارفة اعد كده خالص
الرجل : ( غمزلى بعنيه و هو بيطلع لسانه ) لا
قلتله : ده المفروض
الرجل : ( بسخرية ) المفروض ... أه ... ، المفروض لو مش عجبك أركبى تاكسى و لا ما تنزليش من بيتكوا خالص
توصفى الراجل ده بأيه ؟
هايف و بيحقر من نفسه لأنه واضح انهراجل كبير و بصيت على اديه لقيت فيها دبلة يعنى متزوج و انا زى ما انتى شايفانى لابسة اسدال و متغطية من ساسى لراسى يبقى ده تفسيره ايه غير انه تفتهة و عقل فاضى
تحبى تشتركى فى جمعيات توعى الفتيات يتصرفوا ازى فى المواقف الى زى دى ؟
الجمعيات دى تتعمل للرجالة و الشباب الى بيتحرشوا مش لينا لانهم محتاجين أعادة تربية تانى أو علاج نفسى ، انما احنا عارفين نعمل ايه فى كذا طريقة و كلهم مش نافعين و لا بيجيبوا نتيجة مع الناس دى حتى اللجوء للسلطة مش نافع ده العسكرى و الظابط بيعاكسوا
لما بتتعاكسى بتحكى لاهلك فى البيت؟
لا طبعا ... أستحالة
ليه ؟
لأنهم ببساطة حيكون الحل الأمثل من وجهة نظرهم أنى اعد فى البيت و حتحرم من طموحى و أصدقائى و البيت كله مشاكل و انا مش حستحمل
-------------------------------
س.ط : خريجة جامعة حديثة :
كنا فى جمصة و نزلت مع اخواتى البحر و انا فى البحر بلبس بلوزة و اسعة و بنطلون محستش بنفسى لقتنى دخلت جوه و أخواتى مش حواليا ، حسييت بأيد بتتلف حوالين وسطى بطريقة جامدة أوى حسيت ساعتها أن ضلوعى حتتكسر ، طبعا لقيته راجل طويل عريض ماسكنى من ضهرى ، صرخت جامد و ندهت على أخواتى و انا بشتم فيهطبعا الى فى البحر و الى قاعدين على الشط فهموا أن فيه حد بيتحرش ببنت ألتلموا كلهم عليه أخواتى و بابا و الناس و حارس الشط كمان دخل معاهم و عينك ما تشوف ألا النور
بس من يومها و أول ما خلصت امتحانات السنة الاخيرة فى كليتى و بابا قالى انسى أنك تشتغلى أو أنك تشوفى الشارع تانى ، ما بقتش أخرج ألا معاهم و لزيارة أحد أقاربنا و يكون سبب الزيارة عزاء مثلا أو مرض أفراح أو أعياد ميلاد ممنوع
طب ليه ؟
بابا قالى أذا كان حصل كده و أحنا معاكى امال لوحدك حيحصل أيه؟
تحبى تشتركى فى جمعيات توعى الفتيات يتصرفوا ازى فى المواقف الى زى دى ؟
بقولك ممنوعة أخرج من البيت
توصفى الراجل ده بأيه ؟
قذر و سافل و ربنا ينتقم منه لانه حرمنى من مستقبلى و هو السبب فى العريس الى غاصبنى عليه دلوقتى كلهم بيوله لازم اتستر و اريح بابا من همى ... و أنهمرت فى البكاء
----------------------------
أ.س : 14 سنة :
كنت فى محل أحذية فى شارع فؤاد مع بابا و ماما و أخويا الصغير ، البياع و هو بيقسلى الجزمة حط أيده على كتفى و قالى أقفى يابنتى الناحية دى و البسى الفردة كان ضهره لبابا و ماما و اخويا و كانوا باصين ليا ... لقيت أيده نزليت من على كتفى وصلت لصدرى و فضل ماسكه و أنا مش قادرة أكلم كل الى عملته بعد ما خرجنا عيطت و بابا و ماما يسألونى مالك أقلهم بطنى وجعانى و طبعا ما كانوش مصدقسن يعيدوا السؤال و اجاوبهم نفس الأجابة لحد ما روحنا البيت و ماما مسكتنى تستجوبنى
طب سكتى ليه مدام باباك كان موجود ؟
كان اول مرة تحصلى حاجة زى كده ... خفت .. مش عارفة بصراحة ايه الى سكتنى بس انا ما بقتش عارفة اعمل ايه و انا قلت لماما بينى و بينها ده عاكسنى مقدرتش انطق الحقيقة و قولتها قولى لبابا عشان يرجع يربيه قالتلى اكتمى أنتى عايزة توديه فى داهية ؟ .. أصل بابا عصبى اوى و لما بيتعصب ما بيعرفش هو بيعمل ايه ده مرة رفع على ماما السكينة عشان اتظاخرت فى عمل الأكل و كان عازم ناس و لما روحنا قعدت تقولى لما حد يعاكسك تهزأيه و كده و حجبتنى بعدها و منعتنى البس بناطيل
توصفى الراجل ده بأيه ؟
غبى و متخلف
تحبى تشتركى فى جمعيات توعى الفتيات يتصرفوا ازى فى المواقف الى زى دى ؟
أه .. يا ريت أنا م ابعرفش اتصرف فى المواقف دى خالص
-----------------------------------------
م.ر : طالب بأحدى كليات الفنون
ده شباب مش متربى و فاضى
لو شفت بنت بتتعرض لمعاكسة و تحرش حتتدخل ؟
أكيد طبعا ، أنا ليا أم و أخت و المواقف الى ذى دى بتستفزنى و عادة الشباب الى كده بيبقى جبان و بيجرى على طول
توافق أن الشباب الى زى دول يشتركوا فى جمعيات توعيهم من أضرار الى بيعملوه ؟
الحل مش فى الجمعيات المشكلة بذرتها الأساسية فى البيت . أحنا بعدنا أوى عن الدين ، المصحف محطوط فى اليوت ديكور و لما حد بيربى أولاده على تعاليم الدين الصحيحة بيتهم بالتشدد و الرجعية و أنه كده حيتعقد لما يكبر و على الجانب الأخر البرورنو الى دخل كل البيوت و البركة فى عصر السماوات المفتوحة ... يعنى بورنو مع غياب دينى حيطلع شباب عامل ازاى ؟
--------------------------------------
ح.م: قارئ مستديم بمكتبة عامة 40 سنة
بصراحة البنات هى الى عايزة كده ، عايزين يتعاكسوا ما تقوليليش الحجاب أنتشر هو الى بيعملوه ده حجاب ؟ أنا بشوف بعينى محجبات و منتقبات بيشربوا شيشة فى الكافيهات و ضحكتهم جايبة لاخر الشارع و الشيخ ( خالد الجندى ) قال قبل كده فى برنامج معروف أن فيه بنات بتتحرش بالشباب ، و كمان السينما زودتها أوى بصراحة مش ملاحقين على( الحاجة أيناس الدغيدى و لا القديس يوسف شاهين و لا صاحب العفة خالد يوسف ) منتظرة أيه من شباب محروم مش عارف يجوز بيشوف مشاهد زى دى فى السينما الى أثبتت دراسا عديدة فى علم النفس انها لها سحرها و تأثيرها و انها اداة لا يستهان بها فى تحديد سلوك المجتمعات
يا أنسة انا أعرف رجالة كتير بتدخل السينما بس عشان تشوف المشاهد الجنسية و الى يضحك بجد أن فيه فنانين يوم واقعة التحرش فى وسط البلد أعدوا ينددوا و يستنكروا و كدة .. طب ما اصلا اتنين من زمايلكوا هما الى أتسببوا فى الواقعة دى لما خرجوا فى الشارع قدام باب السينما فى حفل افتتاح فيلمهم و هاتك يا رقصو لموا الشباب حواليهم و انتى عارفة رقص السيدة الفاضلة دينا و ربة الصون و العفاف علا غانم و لبسهم عامل ازاى
و انا احب انتهز الفرصة و أسأل صناع السينما فى البلد دى أنتوا بتقولوا انكوا تقدموا المشاهد دى بنية التوعية ، بقالكوا كام سنةبتقدموا و محصلش اى توعية بل بيحصل العكس و برده مصرين على تقديمها له ؟ ... طبعا أحنا شعب متخلف مش مقدر مجهوداتكوا العظيمة
بس أنت كده رميت كل حاجة ع السينما و عممتتفتكر حضرتك لو واحد على خلق وصاحب مبادئ حيتغير من مشهد سينمائى ؟
بصى أنتى عايزة تدافعى عن السينما براحتك بس مش فى حوار زى ده ، المفروض تكونى محايدة فى أى حوار بتدريه
ما جاوبتش على سؤالى ؟
أه أفتكر ، احنا شعب متدين و الحمد لله أنا أعرف رجالة هجرت زوجاتها الى عشن معاهم على الحلو و المرة عشان جسمها و طريقتها فى ممارسة الجنس مش زى الممثلة الفلانية أو المطربة العلانية و العكس حصل ده مع ستات برده بيقارن بين زوجها و ممثلين بيتفرجوا عليهم و زوجها غلبان بيرجع تعبان و ينام
و يبقى برده الغلط على السينما و لا على الناس دول ؟
لا طبعا على السينما و الممثلين و أنصحك لللمرة التانية بالمحايدة فى حواراتك خصوصا أن شكلك صغير و فيه حاجات كتير فى الواقع لسة ما تعرفيهاش
لو شفت قدامك واقعة تحرش حتتدخل ؟
لا .. و أنا مالى عيل يكون طايش شايل فى جيبه مطوة و لا حاجة ، بصى أهالينا ربونا على أن ما تتعاكشس ألا الى عايزة تتعاكس مدام هى باه عايزة تتعاكس أنا أدخل ليه ؟
توصف الشاب أو الراجل الى بيتحرش بأيه ؟
محروم و الضغوط عليه كتيرة نساعده و نقف بدل ما نجلده فى ميدان عام
نساعده أزاى ؟
يعنىالأب المقتدر مثلا يوفر لأبنه مكان يجوز فيه أو يساعده و أهل البنت ما يتشددوش فى المهر و الشبكة و الحاجات دى للعريس الى يتقدم لبنتهم و الراجل المتزوج زودجته تديله حقه فى الأهتمام و تحاول بأستمرار تكون مرحة و مبتسمة و تحل مشاكل البيت بعيدد عنه و فى هدوء و تهتم بجمالها
أيه رأيك فى الانضمام لجمعيات توعى الشباب ده من أضرار أفعالهم دى ؟
لا ده تضيع وقت حيعدوا يرغوا و يتفذلكوا و الحاضرين يناموا فى الندوات يشوفوا حل تانى
أنت ما ردتش أكتب أسمك الحقيقى ليه ؟
أنا حر
--------------------
حسن عوض : 30 سنة عامل بصيدلية :
كل ده بسبب خروج الست لعمل لو كل واحدة أتفرغت لتربية أولا دها و سابت الشغل للراجل ما كانش حصل البلاوى الى بنسمعها دى ... تستحمل بأه
بس أنا أعرف أن المعاكسة و التحرش من قديم الأزل ؟
أيوة بس ما كانش بالشكل الفظيع ده
----------------------------
أسامة حمدى : 22 سنة طالب بكلية التخطيط العمرانى
أنا رأى حيزعل رجال كتير منى ، أنا شايف الراجل الشرقى أتربى تربية غلط و ثقافة تأخر العقل مش تقدمه و سامحينى فى اللفظ الراجل الشرقى و المصرى بالتحديد ( بيريل ) على أى واحدة أنا بشوف بيعنى منتقبات فى الأتوبيس بتتعاكس أزاى مش فاهم بس هو هبل و جهل و كبت جنسى و خلاص
أزاى منتقبة و بتتعاكس ؟ !!
يعنى مثلا مرة واحد قال : ( سيبك أنتى ما فيش أحسن من الجمال المستخبى )
بتتدخل فى المواقف دى ؟
أه طبعا و على فكرة كلهم بيبقوا فى منتهى الجبن
أيه رأيك فى الانضمام لجمعيات توعى الشباب ده من أضرار أفعالهم دى ؟
أه ، لأن فيه بنات كتير من هول الصدمة ما بتعرفش تتصرف و بيخافوا يحكوا لأهاليهم و أنا بقترح أن يصدر قانون يسمح للبنات بأستخدام لعبة زى الكارتيه مثلا كوسيلة للدفاع عن النفس
---------------------
نشر فى كلمتنا
_
51 comments:
اخيرا اول تعليق من زمااااااااااااااان
مش عارف اقولك ايه على اللي انتي كتباه
هي حقيقه ما نقدرش ننكرها
ولكن الحل ايه
طبعا مش الحل اننا نقعد بناتنا واخوتنا وزوجاتنا في البيت
كان نفسي تعملي في النهايه تلخيص وربط لمجمل ما جمعتيه من آراء أثناء الحوار وتغلفيها في النهايه برأيك ورؤيتك لكن يبدو إنك قررتي تسيبي الموضوع ده علينا , آآآه يااااا معين
شوفي هي المسئوليه مشتركه ما بين عدة أطراف مفيش شك , لكن الأكثر تأكيداً إن هذا الموضوع من الموضوعات المستفزه إلى أبعد الحدود , ومن المخجل حقيقة إن مصر تصبح مشهوره للأسف بهذا الفعل الدنيء وأعذريني على إستعمال ألفاظ من اللغه العربيه لا على سبيل التقعر وإنما لأن البديل سيكون إستخدام ألفاظ السب واللعن وقلة الأدب في وصف من يتحرش وانا مش عايز أستخدم اللغه دي طبعا
في رأيي أن السبب الجوهري لإنتشار حالات التحرش الجنسي في مصر هو أننا كمجتمع ككل نرقص على السلم فلا نحن منغلقين متزمتين متأخرين كغيرنا من الدول التي تأخذ بهذا المنهج وهو الباب اللي يجيلك منه الريح سده وإستريح
ولا نحن منفتحين ومتنورين وناضجين بالقدر الذي تسمح معه عقولنا للسماح لأولادنا وبناتنا بإختلاط محترم ومتدرج وفي إطار صحي حتى لا تصبح البنت بالنسبه للولد والولد بالنسبه للبنت كائنات غريبه
وحيث أن الزمن لا يعود إلى الوراء وحيث أن الإنفتاح الناضج أفضل من الإنغلاق المتزمت فأنا أوؤيد الحل الثاني
وأن نتوقف عن التفكير في أن الإختلاط مفسده للأخلاق وعيب وإن الفصل هو الحل والحقيقه إن ده كله غلط في غلط وأثبت فشله تماماً , بينما الإختلاط المشروع الذي لا يشعر فاعليه بأنهم يسرقون يصحح الأخلاق ويقومها تدريجيا متي صلحت نوايا القائمين والمشرفين عليه
طبعا هذا في ظل إعتناء أصيل بالتربيه الدينيه الصحيحه وده أمر مفروغ منه
متأسف للغايه على الإطاله
وتحياتي على طرح موضوع بالغ الأهميه
ما هى علاقة معاكسة عبد المنعم ابراهيم لأخته بما كتبت بعدها؟؟؟؟
تقصدى لأنه مش عارفها وهى متغطية فعاكسها!!!!!!!!!!!!
مش بحب نجيب محفوظ
===========
لا تخرج المرأة الى العمل الا اذا احتاجت او احتاجها العمل
كلنا مخطئون بدرجات متفاوته المدرسة الى انتهى دورها التربوى والتعليمى الاسره الى انقلب دورها الى مسئولية مادية بس دون تربويه حكومه خلت الحالة الاقتصاديه زفت وحلم الارتباط الى بقى درب من ردوب الخيال والشباب الى فاكر انى اى بنت بتخرج فى الشارع هى عرض مستباح ليه يعاكس او يعمل مابدء ليه ونسى انى ليه اخت وام بتخرج من البيت
أحييك على الموضوع الرائع عظيم الإفادة والصراحة ، لقد لمست مواجع الكثيرين اليومية
أسكندرانى اوى :)
هههههههههه
اخيراااااااااااا ؟
خلاص حكلمهم فى البوستة باه بقالى كتير مفيش تعاون معاهم بسببك
:)
ادعوك لقراءة تعليق محمد فوزى عارض حل معقول فعلا
منورنى
---------------
محمد فوزى :)
هو اصل الموضوع ده انا كنت مكلفة بيه ضمن حملة لمواجهة التحرش فى مجلة كلمتنا و كان مطلوب يعرض بالشكل ده عشان القراء يبعتوا يناقشونا على ايميل المجلة و انا برده فضلت انشره زى ما هو هو هنا فى مدونتى المتواضعة و انتوا تتناقشوا مع بعض عشان الموضوع ده ما ينفعش يعرض من وجهة نظر واحدة
يا سيدى تقعر زى ما انت عايز حد ما يحبش الذوق و الالفاظ الحميدة ؟
تعليق فوق الهايل الحقيقة و لو ما كنتش طولت فيه و اكلمت باستفاضة كنت حعتب عليك و ادعوا كل الأصدقاء لقراته انا ردودى عليهم مش حتكون زى تعليقك بصراحة
منورنى
--------------
الطائر الحزين :)
أقصد أن الشاب الى بيعاكس يحترم نفسه عشان هو ناسى ان ليه اخت و لو ماكانش ليه اخت ليه ام و زوجة و ممكن اوى واحدة منهم يتعمل معاها ده و هو مش دريان
بالنسبة لخروج المرىة للعمل رأيك يحترم طبعا و ع العين و الراس
بلاش الى بتشتغل الى رايحة تدفع لولادها مصاريف االمدرسة ، الى نازلة تجيب علاج لأبوها ، الى بتشترى لوازم البيت ، الى خارجة تزور اهلها ، رايحة تقضى واجب عزاء ، اى حاجة من دى و اتعرضت للتحرش فى مشوارها ، و خلى بالك النماذج الى عرضتها كلها بنات لبسها حشمة و ملتزم و انا قصدت ده عشان ما نرجعش السبب للملابس المثيرة ... الحل أيه ؟ نطالب برده المرآة لوحدها بالألتزام ؟ كل حاجة لازم المرآة هى تعملها و تشيل مسؤليتها لوحدها الراجل مش مطالب بحاجة ابدا خالص كده ؟؟؟؟
تحياتى
---------------
رئيس جمهورية نفسى :)
فينك يا ريسنا من زمان ليك وحشة و الله ما تشوفلك حل فى السكر و الزيت يا ريس عمالين يغلوا و النيسكافية الى بحبه اعمل ايه انا دلوقتى ؟
:)
و الله كلامك معقول و منطقى جدا و تحليله واقعى فعلا هو زى ما قال محمد فوزى هو فيه كذا حد مسؤل بس مشكلة مجتمعنا انه بيرجع كل الاسباب لمرآة لوحدها
تحياتى
--------------
أيهاب رضوان :)
أشكرك يا أيهاب اهم حاجة فى تعليقك أنك لمست أوجاع غيرك
تحياتى
ما سقتيه حضرتك من اسباب تكون وقتية وليس الخروج لمجرد الخروج
وحضرتك عارفة الشوارع والمناظر بتكون عاملة ازاى
ربنا يهدينا كلنا
اسمحى لى بدعوتك لواجب خفيف فى مدونتى دخل الشتا فى موضوعى الواجب التدوينى .
كل حكايات البنات دى بتحصل كتير وكتير بيكون الخوف اول سبب لعدم افصاح البنت لحد من اهلها لانهم لما بيعرفوا يأما يمنعونها من الخروج او يجوزوها لاى حد كأنها هيا اللى غلطانة
موضوع رائع
تحياتى
الطائر الحزين :)
اخى العزيز الفاضل اخبارك أيه ؟
طيب ما انا بسالك لما تخرج لاسباب وقتية او ضرورية مش بتخرج لمجرد الخروج و اتعرضت فى مشوارها الوقتى ده للتحرش الحل ايه ؟ ما هو تفتكر الى بيعاكس او بيتحرش بيقدر يعرف ان الى حيعاكسها دى خارجة لمجرد الخروج و لا خارقة لحاجة مهمة و ووقتية ؟ هو بيتحرش و خلاص ... طب الحل أيه ؟
شكرا على الدعوة و نسال الله الهداية للجميع
منورنى دايما
----------------
ايهاب رضوان :)
حاضر باذذن الله بس ما تعزعلش منى لو ما عرفتش عشان مشغولة اليومين دول
تحياتى
------------
bos bos :)
الحقيقة يا عزيزتى امر من كده بكتير انا لعلمك خففت الحكايات شوية
ربنا يهدى
منورة عندليبيات
ما قصدته هو تقليل من حجم التحرش او المعاكسات
بتقنين الخروج
متفقين على ادانة المتحرش تحت اى ظرف
فى الأساس الكبت عند الشباب
ولو فكرنا شوية هنلاقى ان كلمة البنت هى اللى عايزة تتعاكس بتبرر ان واحد مريض يقولها على اختنا ونسائنا
وكلمة ان الولد ده مش متربى وسافل هتخلينا نشوف نص الصورة
الصورة السليمة ان فيه شباب مريض وفيه شباب زى الفل
وفيه شباب تايه كده مش بيوزونوا الأمور صح
الشباب المريض ده مثلا زى بعض السواقين والبياعين أو من شابههم من المتعلمين واللى بيبقى فئة كتيرة منهم ما عندهمش العيب والحرام غير على أهله ويمكن حتى دى ما يعرفهاش ولا تهمه
والشباب اللى زى الفل دول ..، يمكن تعرف واحد أو اتنين منهم وكل واحد ما بيعاكسش هنحطه مجازا فى الفئة دى
وفيه شباب بأه اللى تايهين دول أو ما عندهمش موازين فدول موضوع المعاكسة عندهم زى شرب السجاير كده بدأ بسيجارة وحرقت صدره وبعدين اتعود عليها ومش شايف انه غلطان فى حاجة، ده اللى يفوقه قلم على وشه بس منهم بأه اللى لما ينحس يبقى من المجموعة الأولى المريضة
وطبعا الدش والانترنت والصحبة السيئة كل دى اسباب ووسائل موت القلب وتنمية الغريزة وهنا يجى دور التربية والإعلام
لأن لما الغث يغلب السمين ولو بالكثرة بس يبقى كل الناس نصيبها من الهبالة بتاعة الأغانى والأفلام هيزيد على حساب النصيب الجيد وبالتالى الحكم تبعا لمدى السفالة فى الأغنية مش تبعا لمعانيها وجمالها
يبقى التربية السليمة هى المناعة الأولى وبعدين الصحبة الصالحة هى المناعة التانية وبعدين الأعلام يهتم بالتثقيف مش بمحاربة قضايا لا تحل بالأفلام وإنما بتشغيل الدماغ والثقافة
وكمان الإعلام بيعمل مصيبة تانية وبالذات السينما بتغذى التناقض ما بين الالتزام بالدين والسعادة فى الدنيا والسلام الاجتماعى
يعنى ما فيش واحد متدين كويس ؟؟ أه فيه بعض الأفلام عرضت الصورة دى بس برضه الصورة بتبقى منقوصة
لماذا الدين يكون مربيا ... لأنه منبع الأخلاق ولأنه الشارع والوازع والمانع
ولا أيه؟؟؟
=========
عذرا لإطالتى
عساى قلت ما يفيد
الحقيقه الناس بقت هايفه جدا و مش لاقيين حاجه يعملوها غير المعاكسه يمكن لو لقوا شغل كان الوضع باه احسن
عالشان كده فى مجله اسمها مجله كلمتنا عملت حمله احترم نفسك لسه فيكى رجاله يا مصر و انا شايفه انها لها تاثير كبير دلوقتى و على فكره المسؤليه مش على الولاد بس دى كمان على البنات ياريت البنات تحترم نفسها شويه و تلبس محترم عالشان متديش فرصه لاى حد يكلمها
و على فكره دى مش قاعده لان زى مامكتوب فى البوست بتاعك البنات كانوا لابسين محترمين
على العموم يا بنات و يا ولاد اتقوا ربنا
ازيك يا عاليا
اولا للأخ اللي بيقول السينما ما هي السينما في الغرب افظع بكتير لو قسناها بعندنا ومع ذلك مفيش تحرش زي عندنا
المشكلة عندنا في التربية نفسها مش في السينما . نتربي على اننا نتفرج على كل حاجة ولكن منتقتنعش بكل حاجة وهو ده اللي فاصلنا عن العالم ان احننا مش عاوزين نشوف الاخر عايش ازاي علشان مش مقتنعين بيه
ثانيا كل الناس بترمي العيب على البنت مع انها مالهاش ذنب ومش حل انها تتدفن في البيت طيب ما تموت اسهل واريح ليها
ثالثا التحرش مش قديم ولا حاجة مكانش فيه كدة زمان واسألي اي حد كبير في السن ده علشان كان في حرية وهو ده الفرق
موضوع جميل فعلا وحيوى وبقى بينغص علينا حياتنا
والسبب عوامل كتير منها انعدام التربية ورداءة التعليم وغياب الوازع الدينى او التشدد الاعمى
السينما والاتجاه الثقافى ،ازمات الشباب المادية
لو قعدنا نتكلم فى الاسباب مش هنخلص
لكن المهم كبداية اننا نرجع نحترم نفسنا وغيرنا كبنى ادمين
انا بس نفسي العباقرة اللي بيقولوا ان البت عايزة تتعاكس يقوللنا عرفوا منين الموضوع ده
يعني لما واحد لا مؤاخذه تعبان بيروح يسأل البت هي عايزة تتعاكس تقولة اه يقوم معاكسها ولما تقوله لا يمشي بادب
وبعدين بتاع تقنين الخروج ده ليه يا اخويا ان شالله. يعني هو الرجاله خلاص مفيش امل في علاجهم فنستخبى احنا. بعد التعليم ده كله والكتب اللي قرايتها والكورسات والندوات اللي حضرتها اقعد في البيت علشان في واحد عاوطلي مش لاقي حاجة يشغل بيها نفسه عايش عاله على المجتمع هيقل ادبه. يا سلام يا سلام اما البلد ستاتها ورجالتها مش عارفين يزرعوا القمح اللي بياكلوه نقوم نقعد الستات في البيت
والراجل التاني بتاع السينما ده حمار بجد. يعني الناس ما بتتعلمش من السينما غير قله الادب مالسينما فيها افلام حلوة تعلم قيم راقيه وسامية ما بتعلموش منها ليه؟ وبعدين يعني الرجاله تعابنين كدة ما يتفرجوش بقه على حاجة تتعبهم اكتر. ولا في حد بياخدهم يفرجهم على التليفزيون والنت والبلاوي ده بالعافيه. وبعدين قبل ما الحاجات ديه تطلع كانت قلة الادب موجودة برضه واظن انتوا فاكرين فتاه العتبه. وبعدين يبقى بالمنطق ده منعاقبش بقه اللي بيسرق ولا اللي بيثبتوا الناس وياخدوا فلوسهم وموبيلاتهم. مهما كمان استفزوهم منظر الموبيلات والفلوس وهما مش لاقيين العيش الحاف
ثم في حاجة تانيه انا في حياتي ما شفت راجل محترم شغال في مكان كويس فاضي للمعاكسة. ومفيش ولد ابن ناس ممكن يسخف على بنت في الشارع. كل اللي بيعملوا كدة ياما سواقين ميكروبصات ودول اذبل ماركة في المجتمع ياما مجموعة مرميه على ناصيه شارع ولا قهوة خارجه من حسابات الزمن وتقريباً بياخدوا تمن سجايرهم وقهوتهم من الست الوالدة او من مراته اللي بتبقى دايرة بتخدم في البيوت او من اخته اللي نزلت تشتغل علشان تساعد امها علشان البيه مابيعرمش في شغلانه
لسه النهاردة واحد من اللي بيسرحوا بفراخ ف الشارع قايلي كلمتين سخاف عالصبح وانا ماشيه بس بصوت واطي قمت انا راده عليه بصوت تسمعه الناس كلها وقولته اخرس يا بغل. وديه احسن طريقه للتعامل مع الحيوانات ديه. لو اللي بيسخف حس ان البنت بتخاف بيزودها ولا حس انها هتهزق امه بيتلم
بس كفايه كدة
Love,
MishMish
للاسف كل دا فعلا بيحصل واكتر من كدا فى مجتماعنا طبعا الا من رحم ربى
بس للاسف فعلا المعاكسات بقت عينى عينك لا فى خشى ولا احترام
وكمان دلوقتى بقت المعاكسات بتحصل للبنت وهى مع والديها يعنى مش لوحدها
والحل مش القعدة فى البيت
دا مش هيحل المشكله
لان فى مصر زمان كان الكل متنقب وكانوا بيتعاكسوا ايضا
بس مش بنفس طريقه الزمن اللى ما يعلم بيه الا ربنا
تحياتى
مرة كنا من كام سنة بنلعب كورة وولد معانا بيعاكس بنت
طلعت اخت
واحد زميلنا بيلعب معانا
ههههههههههه
عارفة ياعاليا
لازم اى انسان يفكر قبل مايعمل حاجة انه يرضى انه يحصل كدة لاخته او زوجته او والدته
بجد دول ناس عايزين القتل
والبتر من مجتمعنا بجد
ولازم يكون فى حزم فى الموضوع ده
بيبتدى من التنشئة الاجتماعية السليمة
السلام عليكم ورحمة الله وبركاته
كلهم اجمعوا على ان الشباب الى بيمارسوا هذه التصرفات يتصفوا بالجبن
طب والحل ياعاليا البنت تعمل ايه اكتر من كونها التزمت فى لبسها وفى سلوكها
وما فيش كتير بيرضوا يتدخلوا للدفاع عنها زى ما اوضح الاستفتاء
يعنى نقعد فى البيت ونرمى طموحنا ورا ضهرنا ولا ايه
انا الحقيقه الى بسال لان ما عنديش اجابه وهو موضوع مؤرق فعلا
خسارة بكل المقاييس خساره على الاخلاق الى بقت فى الوقت الحالى موضه بتتشكل اشكال مختلفه عن بعضها
خساره على الشهامه والرجوله
خساره على دينا الى باءه وراء الظهور اكثر مما بقى امام الوجوه
خساره
دومتى بخير وحفظك الله
والسلام عليكم ورحمة الله وبركاته
بجد حوار جاااااااااااااااامد
ومتميز
واراء مختلفة وبتعبر عن رأى الناس فى الموضوع دة
وللاسف كتير الموضوع دة منتشر بشكل مرعب وانا فى رأى ان دى انانيه ونتاج للمجتمع الذكورى اللى احنا عايشين فيه فليس من حق المرأة الخروج وان خرجت فالذئاب فى انتظارها اى انهم حيوانات لا تتمكن التحكم اين اذن التربيه ان وجدت
ولست مع النساء الى الاخر فهناك ايضا سلبيات وبالفعل هناك نساء تشجع
التحرش الجنسى مسئوليه الفرد والمجتمع وتربيه خاطئه ومشاهد عرى وكبت
وانفس مريضة انها بالفعل مشكلة غايه فى البشاعة والابشع ان نلقى على المرأة اللوم وكأنها هى السبب
أدعو معك لوقفة ولجمعيه لدراسه هذة الظاهرة البشعة
السلام عليكم
موضوع التحرش اصبح فعلا موضوع مستنفز
اللي بيتحرش بواحده ايه اللي خيلية يعمل كده الا اذا كان يوجد شئ بداخلة ينقصه
واكيد من الناحية الدينيه هو معيرفش اي حاجة خالص
ربنا يعافينا ويعفو عنا
الطائر الحزين :)
انا حاسة انى تعبتك رايح جاى رايح جاى
بس انا سعيدة طبعا بده انت عارف معزتك عندى ع العموم يا سيدى عبد الحليم قالى اصرفلك بدل انتقال
ههههههههه
أيون أبتديت أفهم اتضحت الصورة خلاص
بس برده مع احترامى مش ده الحل و برده انت مقدمتش اى نصيحة من نصايحك الى احنا متعودين انها حكم اكثر منها نصائح لجنس الرجال خالص
أيد لوحدها متسقفش
على فكرة نسيت اقولك انى بقالى بتاع ست اشهر كده بتعاكس من واحد فى التليفون معرفش جاب تليفونى اهزءه مفيش فايدة ، أفتح عليه السكة أسيبه يهاتى مع نفسه و اخلصله رصيده مفيش فايدة ، اهدده بلواء شرطة وهمى من اختراعى مفيش فايدة بيقول انه عايز يتعرف و خلاص و على فكرة حكاية التليفونات دى موضة جامدة اليومين دول مع بنات كتير و أهوه لا شافنى و لا يعرفنى اصلا بيعاكس ليه ده باه ؟؟؟؟؟
خالص تحياتى
----------------
arabic id :)
لا يا عزيزى مفيش اطالة و لا حاجة انت المفيد فعلا و عداك العيب و ازح
ههههههههه
بس اختلف معاك فى حتة الاعلام انا شايفة ان مهما كانت المشاهد الى بشوفها استحالة تغير فى تربيتى و اخلاقى
انا بصراحة مش متصورة حد يغير مبادءه و يستهين فى دينه من مشهد تمثيلى !!!!
خالص تحياتى
--------------
aliawwee :)
بالنسبة للهيافة اتفق معاكى تماما كفاية الى بيعكسوا فى التليفون دول لوحده منبع الهيافة اصلا و التفاهة
يا بنتى ما الحوار ده انا عملته لمجلة كلمتنا من ضمن الحملة و ذكرت ده فى اخر البوست
تحياتى
------------------
big cod :)
الحمد لله بخير انت أيه اخبارك
ما هو ده الى بقوله التربية و الضمير هما الاساس و استحالة اى شئ مهما كان درجة تأثيره انه يقدر يغيرهم و البنت باه على رايك تروح تموت احسن
منورنى دايما
------------------
اهوه ده عيبه :)
يا اهلا اهلا أستبشر خير ان الهارد بتاعك اتصلح ؟
كلامك جميل يا داليا و الله
المهم اننا نرجع نحترم نفسنا
هيهات
تحياتى
---------------
أبو على :)
ما انا عارفة ان الراجل أله أو نبى او ربما ملاك نازل من السما أستحالة يغلط فصحيح حنحمله جزء من المسؤلية ليه ده جاله جواب من الجنة انه داخلها دالخها معفى من الحساب
تحياتى
ميجو مشمش :)
انتى يا بنت بتوحشينى بتغطسى تروحى فين و لا مستخسرة فيا اضحك من القلب يعنى
طب
ههههههههههههه
أولا بس الأخ بتاع تقنين الخروج ده اخ عزيز عليا جدا و من اوائل اهل عندليبيات هو ما يقصدش المعنى الى وصلك بالظبط هو شخصية متفتحة على فكرة
بتاع السينما ده اه حمار و ستين حمار بس انتى مية مية فى حكاية هم بيعرفوا ازاى ان البنت هى الى عايزة تتعاكس
:)
ضحكتينى باه على الراجل بتاع الفراخ ده
هههههههه
طب مش يركز فى القفص الى شايله فوق راسه و يشوف شغلانة تانية عشان انفلوانزا الطيور ؟
مفرفشة عندليبيات
-------------
صاصا :)
اه و الله يا مصطفى فيه حكايات ابشع من كده بكتير بس انا مرضتش اتقل عليكوا اوى يعنى غير ان فيه حاجات ما بقتش عارفة اعرضها ازاى من هول صدمتى دول ما يتقالش عليهم بنى ادمين من أساسه
و يا ريت نفكر فعلا فى حل غير ان الست تعد فى البيت لان حتى لو ما اشتغلتش فيه مشاوير حتضطر تعملها غصب عنها و عن زوجها لازم يبقى فيه حل تانى
تحياتى
----------------
مدحت محمد :)
ههههههههههه
ما هى الحكاية دى شبه حكاية عبد المنعم أبراهيم
لا بس جامدة
:)
م فعلا لو الى بيعاككس ده تخيل اخته او زوجته او بنته فى الموقف ده المفروض يلم نفسه باه
لا اختلاف طبعا على ان التنشئة الأجتماعية هى الأساس
منورنى دايما
----------------
مؤمنة :)
السلام عليكم و رحمة الله و بركاته
ازيك يا اختى العزيزة عاملة ايه ؟
دعواتك معانا و النبى اليومين دول يفتحها كده فى وشى و يثبتنى
أيوة
سمعاكى
كترى باه منها اليومين دول
:)
خسارة خسارة فراقك يا جارة
عنيا بتبكى عليكى بمرارة
الوحيدة الى خدت بالها من معنى العنوان
بالنسبة لسؤالك انا اصلا عاملة الحوار ده عشان حد يجاوبنى عليه و برده مالقتش
و السلام عليكم و رحمة الله و بركاته
------------------------
رئيسة حزب الأحلام :)
يا جااااااااااامد انت يا جامد
:)
التعليق بتاعك أضاف جديد لباقى التعليقات و هى جزئية الأنانية و المجتمع الذكورى
منورانى دايما و ابقى احجزيلى مكان و النبى فى الحزب يمكن احقق بيه حاجة
:)
-----------------
أبن مصر :)
و عليكم السلام و رحمة الله و بركاته
هو مستفز و بس
؟؟؟؟؟؟؟؟؟؟؟
برده تعليقك أضاف جديد و هى جزئية الشعور الداخلى بالنقص
خالص تحياتى
لازم اقول
بس الحقيقه بتجرح فعلا بس مش كل الرجال هكذا والى كده والله بيبقى عنده نقص ؟
بجد وحشنى البلوج بتاعك جدا ومواضيعك المميزه ؟"
الحل اننا نتعلم الاخلاق اللى حث عليها ديننا ونتقى الله فى انفسنا وفى الاخرين ونحاول نزيد خمن ثقافة المجتمع تجاة التحرش الجنسى
تحياتى لموضوع شيق وتغطية رائعة
أبو على :)
انت شايف انها ظواهر ازاى يعنى مش فاهمة الجزء ده
و تمثيل ايه مش فاهمة حاجة من كلامك
و الكلام ده ليه ميتقالش فى مجلة و لا فى بلوج امال حتعرف ازاى ان اختك او ووالدتك ممكن يتعمل فيها كده و هى فى الشارع مش المفروض ان شغلة الصحافة انها تكشفلك الحقائق و تنبهك ؟
و بعدين ما احنا بنطرح الكلام عشان نشوف فين المشكلة و انت قلت فى تعليقك الى فات ان المشكلة اساسها الست لوحدها و هى كمان اساس التقوى و الفجور و ما قلتش الراجل اساس ايه
بس خلاص عشان كده بقولك ان الرجالة ملايكة ما بيغلطوش عشان لو كانوا بيغلطوا كنت حتحملهم جزء من السبب
تحياتى
--------------
صوت من مصر :)
طبعا متفقين و انا مقلتش ان كل الرجالة كده بدليل انى سالت ولدين محترمين و اظن انت قريت كلامهم
و انا كمان وحشنى بلوجك بس مشغولة فى تدريب جديد و الله
تحياتى
------------------
كلاكيت تانى و تانى :)
كويس انك ظهرتى انتى مانعة التعليقات عندك ليه ؟
كلامك فى الصميم يا عزيزتى اقول ايه بعديه
تحياتى
التخلف من الناس الى بيتحرشوا
و الناس الى فاكرين انهم اما يحبسوا بناتهم فى البيت يبقى كدة بيحافظوا عليهم
لانهم بيعلمواهم ثقافه الخوف و الجبن
و عدم الثقه و كمان التبعيه
لازم يكون فى مراكز فعلا
بس مراكز لمين
للشباب و لا الفتيات
تعرفى ان اقول للفتيات و نعرفهم ازى يتصرفوا فى غياب شجاعه اهلاليهم و اكتفائهم بس انهم يحبسوا بناتهم
تحياتى
النموذج الاول الراجل اللى قاعد رجل هنا ورجل هناك ده حصل معايا مرة وكنت راكبه ميكروباص بمجرد ما بدأ يقل ادبه قولت له مش هتقوم من هنا بالذوق هقومك باللى فى رجلى وبصوت عالى كل اللى فى الميكروباص عايزين يعرفوا عمل ايه بس السواق طلع جدع ووقف وقاله انزل بهدوء بدل ما انزلك بالعافيه واعدى عليك بالميكروباص وديتك عندى خمسين جنيه ولكى ان تتخيلى المنظر وهو نازل بقى لما راجل طالع معاش واحفاده طالعين معاش يتهزأ بالشكل ده لانه اساسا مهزأ
بتاع السينما ده شكله اساسا راجل بينزل علشان يعاكس وبالتالى ليس على المتحرشين حرج فى كلامهم العبيط
هو الحل ان البنت مش تسكت للى بيعاكسها علشان مش يفهموا بعد كدا ان البنت هى اللى بتحب تتعاكس
اصلها طالما سكتت يبقى خلاص
استبيان جامد يا عاليا
مودتى يا جميله
أبو على :)
شكرا على اهتمامك بالمتابعة
------------------
رانيا :)
هو بالظبط كده زى ما بتقولى بس مين يسمع و مين يقرا
-----------------
قطة الصحراء :)
يظهر يا قطة يا اختى الراجلة بقوا ضعفا اوى يا عينى
هو فى الاول ة فى الاخر غياب للدين لان الانسان الى بيعمل كده لو عارف ربنا هيكتشف انه كده نوع من حرب الله و رسوله و الى عقوبته بتدا من النفى فى الارض للتقتيل و ليس القتل اى المبالغه فى القتل و لو فكر شويه ان داين تدان عمره مهيعمل كده
ربنا يطهرنا من كل انسان معندوش ضمير
بكير :)
لا لسمح الله ما تقولش غياب الوازع الديني أحنا شعب متدين
للأسف قليلون الي بيعترفا بالحقيقة ديالراجل الي بيعاكس بيقول الست هي السبب أنما هو راجل تقي و متدين
ههههههههههه
منورني دايما
------------
أبو علي :)
أنت عايز تتناقش معايا ليه أنت مش بتقول أنك شايف كلامك هو الي صح طب خلاص حكلم معاك في أيه ؟ عرضت وجهة نظرك و أنا سمعتها
ثانيا بتتناقش ليه مع واحدة من صنف النساء أحنا مش برده أساس الفجور في الدنيا ؟
و نسيت أننا كمان ناقصات عقل و دين ... ما رضالكش تتناقش معايا آتناقش مع بني جنسك أديك ضامن أنك بتحتك بأساس التقوي الأيمان
و أنا لما حخلف أن شاء الله حعلم أبني يتقي الله في نفسه قبل بنات الناس ما يجريش ورا أرتكاب ذنب زي ده بجج فارغة حطلعه قوي و أيمانه قوي و أخلاقه بنيانها متين ما تقعش قدام أي واحدة و لو رقاصة حتي واقفة قدامه ببدلة الرقص
الراجل الضعيف الي أخلاقه حسب لبس و دلع البنات يروح يدورله علي أي صفة تانية غير الرجولة و بالمرة كدة و هو بيدور يفكر مع نفسه يا تري لو جاله خبر أن أخته و لا أمه أغتصبوها أو بلاش أغتصبوها أتحرشوا بيها و لا حتي عاكسوها يا تري ساعتها حيرجع السبب لمين ؟ و حيعمل أيه ؟
منورني
ياااااه ياعاليا
اول مره اقرأ لكي بوست وأشعر سامحيني على اللفظ بقرفه شديدة من أفعال تأتي من ضعاف النفوس مرضى
لكن هناك الكثير مازالت لديهم الفضيلة تحتل نفوسهم وقلوبهم
وموضوع الجمعيات ده حقيقي ولا هو تهكم ليس الا سامحيني على تأخري لسفري والحمد لله عدت وان شاء الله ادوام على متابعتك
حسن أرابيسك
المعاكسات للأسف بقت بتهدد أمن فتيات كثيرات
موضوع ومجهود رائع تشكري عليه للاسف الشديد احنا فقدنا حاجات حلوة كتير اوي جوانا اخلاقيتنا بقت صفر للاسف الشديد وعلي فكرة مش مصر بس جميع الدول العربية بقي شبابها ورجالتها وستاتها كمان زفت الوضع مؤسف جدا ومخجل انما الخير في وفي امتي الي يوم الدين شكرا علي مجهودك
وشكرا علي تعليقك الجميل عندي تحياتي
السلام عليكم
بجد تسلم ايدك يا بنتي
كلامك جميل فعلا واقعي جدااااااااااااا
تسلم ايك
بصي
انا هقولك حاجة واحد عشان مطولش عليكي:
الي بيعاكس مش بيعاكس عشان هو معجب
بيعاكس عشان هو فاضي
بس صدقيني البنت لما بتتعاكس بتفرح اوي حتى لو بينت عكس ده
تحياتي
السكرية فيلم بيأكد أن لينا تاريخ ياريت الكل يحافظ علية فكرتيني والله يا عليا بمواقف كتيرة عجبتنى من الفيلم
حمدالله على السلامة من بوسعيد يابابا
تحياتي ليكى يا عاليا
اتمنى لكى التوفيق
صديقك
سيد سعد
البوست جميييل جميييل..
شوفي يا عاليا
الموضوع له جوانب كتيرة
ممكن نقول أكثرها أهمية التربية والتعليم
لان زمان كانت المدارس بتربي وتعلم في نفس الوقت
وكل حاجة طبعا دلوقت بقت مششي حالك
وبقى مفيش جودة في أي شيء
فالمنتج التعليمي رديء جدااا
اللي هو احنا من الناحية الثقافية والتعليمية والتربوية
يعني مثلا مبقاش في حد بيقوم في المترو علشان يقعد واحدة واقفة
دي قيمة بدأت تختفي من حياتنا
كلمة شكراً مبقيتش موجودة بين الناس
كل حاجة بقى فيها تجهم وبقت تحياتنا بعد صباح الخير
صبح صبح يا عم الحاج
وطبعا علشان مادة الدين مش بتضاف للمجموع وده للمسلمين والمسيحيين
فبقت مش مهمة يبقى ازاي عايزة الاولاد يطلعوا عارفين كلام ربنا وجملة
كمان تدين تدان
والضغوط الاقتصادية كمان مش خلت الاب فاضي يقعد في البيت علشان يربي أولاده ويعلمهم يتصرفوا ازاي
ده يدوب بتطلع روحه علشان يقدر يأكلهم .. فلو قعد يربي فيهم ويقول لهم الصح والغلط يبقى مفيش مامممم
فهو كمان معذور
يعني لا بقى في مدرسة بتعلم
ولا بيت بيربي
تفتكري هتكون النتيجة اييييه؟
واحد محترم يعرف حرمة الغيير
وان حريته بتنتهي عند بداية حريات الاخرين
تفتكري هيكون النتاج الطبيعي اييه؟
الزرع عندنا دلوقت بقى شيطاني
اكيد النتيجة هتكون بردو شيطاني
ازاي يطلع قمح وقطن
هو احنا تعبنا في زراعته ؟؟
تحياتي
وليد
عاليا الموضوع هاااااااااااايل
بس لو اتكلمنا للصبح مش هنلاقي حل. لاننا عندنا معتقدات و غباء اجتماعي و تربوي وصلونا لكدا
للاسف لو كل مسلم اخد بتعاليم الاسلام و كل مسيحي اخد بتعاليم المسيحية هنلاقي اننا بقينا افضل كتير. لكن الواقع اننا مجتمع متخبط عايش بفكر غلط و ازدواجية
موضوع مهم بجد
بس الحمد لله متعرضلهوش بالصورة دى
والحمد لله بردو لو حصل لا قدر الله واتعرضتله اكيد هتبقى عندى القدرة انى اخد حقى ومن غير ما اعمل مشاكل او احسس اهلى ان خروجى خطر عليا
ربنا يعافينا يارب ويصلح حال شباب امتنا
دمتى بكل خير :)
موضوع قوي اوي
بالرغم انها مشكله قديمه بس زادت اوووي
مش هعيد كلام الناس تاني
بس رأيي
اولا: ليه بنحمل كتير البنت المسؤليه كلها حتى لو كانت لابسه ومتغطيه تماما
ثانيا: ردود افعال الناس في المواقف دي محبطه جدا وخصوصا ان حتى اللي بتتكلم مبتلاقيش رد فعل من المجتمع غير تحميلها المسؤليه ومنعها من حقوقها
ثالثا: اللي بيعمل كده فاكيد فاقد الضمير والاحساس بعاقبه اللي بيعمله لانه لو فكر بالعكس وان امه ولا اخته ...هيمتنع....واكيد مفيش وازع ديني
ومجتمع بيغمض
يمكن يكون جزء من الحل الجمعيات لتوعيه البنات برد الفعل يكون ازاي
بس الاهم النبته اللي في افكار وقلوب المجتمع ككل واللي بيتصرف كده خصوصا
آرابيسك :)
حمد الله ع السلامة عود احمد
أنا ما يسعدنيش طبعا أن آوصل لحد من الي بيقرالي شعور زي ده بس حمل أيه فيه حاجات كتير في الدنيا لو ما زكلمناش فيها و سلطنا الأضاد عليها ححتتشفي في حياتنا أكتر و أكتر
مقدرة شعورك و متوقعاه لأن ولاد البلد الي زيك الي بجد مش ألقاب بقوا حقيقي عملة نادر
و ما تعتذرش عن الغياب أنا مقدرة الظروف
منورني دايما
------------
مجلة علي صوتك :)
أهلا بجيران شارع الصحافة
لا هو الحق يتقال لسة موصلتش لدرجة تهديد أمن البنات الحمد لله برده لسة فيه شباب دمه حامي بيقف قفة جدعنة في المواقف الي زي دي
تحياتي
--------------
سندباد :)
كلامك جميل لوا وجود فكرة التعميم فيه
لسة فيه ناس عندها أخلاق في مصر أو الوطن العربي كله
تحياتي
-------------------
الدمعة :)
و عليكم السلام
ده مش كلامي دي كلام بنات حصلها ده فعلا
تحياتي
----------------
أبو علي :)
أنا عمر ما يزعلني الرأي الحر أبدا ما فيه ناس كتير بتختلف معايا و مفيش حاجة و من أعز أصدقاذي كمان أنا الي بيضايقني طريقة عرض الرأي و ما بحبش التعميم راجع
تعليقات و أنت تفهم
تحياتي سلاماتي أختلافاتي
:)
يوميات نائمة في الأرياف :)
سيدي يا سيدي ع الأسامي و الصر الجامدة
الأسم يشد علي فكرة
برده ما بحبش التعميم معاكي أه فيه بنات يدب في عنيها رصاصة و بتفرح و يمكن بتخطط كمان للمعاكسة بس كلهم
نورتيني
---------------
مكسرات سيد :)
كويس أنك ظهرت يا أبو السيد في التوقيت ده بالذات المكسرات نازلة غالية آوي علي رمضان شفلك حل
:)
أنت معلق علي المقدمة و سايب الموضوع ليه ؟
تحياتي
------------
صباح الصباح :)
صباحك جميل جميل
منورني
--------------
عارفة مش عارف ليه :)
أرد عليك أقول أيه بس تعليقك خلص كل الكلام
ده موضوع لوحده
تعليق قيم جدا أشكرك عليه
amy :)
عداكي العيب و أزح يا بنتي دايما أنتي لما بتظهري بتجيبي المفيد
:)
-------------
original heart :)
أنا معاكي لازم تكون البنت عندها قدرة علي الأعتماد علي نفسها في المواقف دي
نوزتي عندليبيات
----------------
زمردة :)
أزيك يا باشا
أولا و ثانيا و ثالثا دول الي رايحة جاية أشرحهم في التعليقات
يا ريت الباقييين يقروا تعليقك
منوراني دايما
Post a Comment