غريب أمر بعض الشباب فى زمنا بيتباهوا بالمساحة إللى حصلول عليها من الحرية و التحضر و إللى قدروا ينجزوه من رجاحة عقل و إتساع أفق و أستثمار الوقت بشكل مفيد و أنهم خلاص أصبحوا زيهم زى الغرب ... شباب واعد بينجز عارف هوبيعمل إيه ، لكن يا ترى أصبحوا زيهم فى إيه ، أيه االشئ إللى بيتباهى بيه فئة الشباب المقصودة هنا ؟ إنه ماشى وفى جيبه ميدالية ببلاش أسمها ( جيرل فريند ) ؟ أيه إللى الفتيات دول حققوه من إنجازات غير التريأة على البنت المكافحة إللى بتاعفر عشان توصل و تنجح و بيتهموهم بالسذاجة و فاكرين نفسهم هم إللى فاهمين الدنيا صح و حاطين الدنيا فى جيبهم زى الشبان إللى حاطينهم فى جيوبهم بالضبط ؟حبيت أفهم من النوعية دى نفسهم يعنى إيه ( جيرل فريند ) من وجهة نظرهم ؟ و الصديقة دى صفتها إيه بالضبط ؟ أو وظيفتها إيه؟ هل أرتباط بنية التعارف قبل الزواج بس بتوفر عن الخطيبة نظرا للظروف الإقتصادية إللى إحنا فيها ؟ و لا هى عشيقة بتاخد وقتها و تيجى غيرها بس إسمها تطور ل ( جيرل فريند ؟) و لا فتاة ليل عصرية بدل إللى كانت بتقف على عواميد النور بالليل فى شارع الهرم ؟ ..و لا الحكاية إنه مجرد لقب و أتغير و بدل ما كان بيقول الشاب ( البنت الى ماشى معاها ) أصبح يقول ( صاحبتى ) ... أشيك يعنى ؟ حسب ما سمعت من واحد ... و لا فيها إحترام للمرآة ؟ !!!!!حسب ما سمعت من واحد تانى .... فعلا منتهى الإحترام للمرآة ... طبعا فيه ناس بتقرا دلوقتى حتقولى ما هى المرآة إللى قبلت الوضع ده ... مفهوم طبعا معاكوا تماما لكن من كتر ما الراجل نال مساحة كبيرة أوى على مر العصور من الدفاع عن و تبرير أخطاءه لدرجة خلته بيعمل الغلط و مش حاسس إنه و أحياناً بيتباهى بالغلط و الناس بتسامحه و بتغفرله بتنساله و اولهم الاسرة بتشوف غلطه و مش حاسة إن أبنهم بيغلط بتعمد أذكرأخطاء الرجل بمساحة أكبرمن أخطاءالمرآة .. أظن كفاية كده لازم يتحاكم هو كمان و يعرف غلطه و يعرف إنه طرف أساسى فى الخطأ و إن مش الرجولة إنه يلون أخلاقه حسب أخلاق البنات .. المحترمة يتعامل معاها بأحترام و قليلة الأدب يقل أدبه معاها و يقول ما هى عايزة كده و يقف هو كده من غير شخصية و لا مبادئ ... عمر ما كانت دى الرجولة ... الرجولة ما تهزهاش حاجة و الراجل إلى بجد بيفضل على أخلاقه و مبادئه مهما كانت قذارة البنت إلى قدامه
مش دايما يعنى بتبقى نية الشاب إنه يتسلى، صاحبتى إللى معايا دلوقتى كنت بحبها فى الأول و عايز أخطبها لحد ما أخلص دراسة و ألاقى شغل بس لقيتها هى عايزة تلعب ... قشطة برده شغال
طب لما أنت محترم و كانت نيتك الجواز و لقيتها هى كده أستمريت معاها فى علاقة خطأ ليه ؟
الرك ع البنت هى مبسوطة كده و أنا محترم مع المحترمة و لعبى مع اللعبية
**************
م\ن -40 سنة ممتنع عن الزواج
---------------------------
مش عايزأتجوز عشان مبحبش حد يقيد حريتى و بصراحة لجأت لتجربة ( الجيرل فريند ) لأنى سئمت الوحدة و محتاج لأنثى فى حياتى
عايشة معاك ؟
أه .. بس ما بتباتش معايا فى الشقة
أهلها عارفين ؟
أه .. أهلها ناس ثقافتهم عالية و متحضرين و عارفين ان دى مرحلة تعارف ما قبل الزواج
و انت حتجوزها فعلا ؟
لسة ما قررتش ، مش قادر اخد القرار
طب بتحبها ؟
لأ .. بس برتاح معاها
بتحصل بينكم معاشرة جنسية ؟
مش بالشكل الكامل
واضح إنك متأثر بالحياة الغربية ؟
فعلا أنا سافرت برة كتير و لى أصدقاء أجانب
تفتكر الجزء الشرقى الى فيك هو الى متردد فى إتخاذ قرار الزواج من صديقتك ؟
( إبتسمإتسامة ضيقة ( ممكن
--------------------
( الغريب إن فى نهاية دردشتى مع الراجل ده قالى إن مش كل اصدقاءه الأجانب مقتنعين أو بيطبقوا فكرة الجيرل فريند و إن مش كل أمهات الغرب بيحترموا الجيرل فريند إللى بتيجى تعيش مع إبنهم فى البيت بدون زواج
*******************
ح ز م : أستاذ تاريخ
----------------------------
متزوج حاليا و كان ليا أكتر من صديقة فى وقت واحد قبل الزواج ، فيه إللى كنت بتعرف عليها بنية الزواج فعلا و فيه إللى كنت بشوفها تنفع اكتر للعب
زوجتك واحدة من إللى أتعرفت عليهم ؟
مش بالضبط .. أتصاحبت عليها وسط أسرتنا احنا الاتنين و الكل كان عارف علاقتنا كنا بنتقابل وسطهم عادى فى بيت حد فينا فى النادى فى عزومة .. و اتصل بيها على تليفون البيت قدام اهلها عادى و إعجابى بيها أتحول لحب و قررت فعلا أجوزها عندك بنات .
بنتين ؟
لو واحدة منهم فى يوم واحد أتصل بيها و قالتلك يا بابا ده ( البوى فريند بتاعى ) حيبقى موقفك إيه ؟
حقولها إعزميه يجى البيت و نتعرف عليه أحسن بدل ما تعمل حاجة غلط من ورايا
--------------------------
المفروض ما أكونش متحيزة .. لكن بما إن الموضوع هنا متاح للتفكير الجماعى و الدردشة .. أحب أوضح إنى احترم رأى الراجل ده
إيه الحكاية يا عمرو ؟ :) ( تحدث بتهريج )
البنات دول نعمة عايزة الى يقدرها
انت عندك اخت بنت ؟
ظهر عليه الضيق نوعا ما ) لا ..( ثم أسترسل ) أنا والله ما بغصبش واحدة على حاجة و لو عندى
أخت بنت مش هتبقى زى البنات دول و بعدين بابا عارف و بيبقى قاعد سامع مكالماتى و بيضحكلى و ساعات بيفمزلى .... ماما هى إللى فلقانى كل شوية تقولى انت رايح تصاحب و لا رايح تتعلم
10 comments:
حسبنا الله ، الحل فى الزواج المبكر
فعلا الموضوع بقا منتشر جدا
والمشكله ان التفكير الغربى طاغى علينا
يعنى مثلا
فى واحد صاحبى مرتبط ببنت علاقة حب
صاحبته زى ما بيقول
ولكنى على معرفه به منذ طفولته
فهو لا يقدم على المعاشره الجنسيه
وطالما سمعت البنت نفسها تطلب منه ذلك وهو يرفض
وكان سؤالها عجيبا
كيف تحبنى وتأبى معاشرتى؟!!!
الثقافه الغربيه طغت كثيرا
اللهم اهدنا وابعدنا عن كل ما يغضبك منا
اولا الموضوع هايل ويستحق النقاش فيه كل حاجة بنعملها تلاقيها من الثقافة الغربية ليه التبعية المطلقة دي .عشان ما فيش شخصية جوا معظم شباب اليومين دول قوية بسرعة يتاترا باي حاجة ومش مهم دينا حيتقبلها او لا مش عارفة الناس حصل ليهم ايه الشباب بيدور على بنت عشان يتسالوا والبنات بيدورا على حد يسمعهم كلام حلو وفي النهاية بيدفعوا الثمن غالي اوي وكرامتهم تتهزاء وهما مواصلين في نفس المسار.دلوقتي الكل عايز يتصاحب ادي لي بيقلد صاحب او صاحبتها ودا لي فاضي ومش لاقي حاجة يعملها وفي نهاية يقولك او تقولك بنحب بعض بس دا مش صح الحب دا بالنسبة لهم مجرد ستار عشان يمارسوا كل الانواع لسحق الكرامة والاخلاق اللي بيحب بجد بيحترم الطرف الثاني ويتمنى لو الخير ويوقف جانب لحظة الجد وما يعملش اي حاجة تمس بشرف واخلاق مش مشكلة انو الواحد يرتبط بس قبل كدا يحدد هو عايز ايه من الطرف الثاني ويحترم الانسان اللي حيعش معاه عشان لو احترم في البداية حيحترم طول العمر ولو ما كانش كدا فعمر ما حيحترم ودايما حتبقى الصورة الوحشة عن شريك جوة عنيه وفي النهاية عايزة اقول لكل الشباب بلاش لعب وخداع على البنات ولو عايزين اصدقاء يبقى اخترو صح ولو حبيتوا حبوا بجد او سبوا كل واحد في حالوا وبقول للبنات كفاية من سحق للكرامة وابداؤ صفحة بيضة واخلصوا للانسان اللي بتحبه والماديات مش كل حاجة ربنا ينعم علينا برحمة ويقوي حبنا بيه يارب
تحياتي
girl friend
يعنى موزه
نسيت اقول الموضوع هايل
الخطأ لا يفرق بين جنس
بتفق مع راجي في كلامه عن الزواج المبكر
بس افتكر ده مش متاح حالياً بسهولة
وعلشان كده كان اللجوء لحلول بديلة
ومنها اللي طرحتيه هنا
وافتكر ان المشكلة إن كلنا حاطين راسنا في الرمل
ومش واخدين بالنا ان أي راجل لما بكون له علاقة اكيد بتكون مع الطرف التاني والخطأ متساوي بين الطرفين مفيش حد خاين لوحده ولا مجبر غصب عنه
وبصراحة شايف الصورة قاتمة
وافتكر ان كان في صدمة لمصر كلها
وقت حدوث حادث اغتصاب فتاة المعادي الشهيرة
الاحساس بالصدمة ده تراجع اووووي وبقى كل يوم يتم استقبال الخبر بشكل عادي
وبعد كده بقى في مشاركة جماعية
في التحرش الجنسي
بمعنى أن كل يوم بيكون اسوء من اللي قبله
ربنا يلطف بنا
---------------
ملحوظة :
لا استثني نفسي من المقصرين
تحياتي
وليد
انتشار هذا الموضوع هو احد مظاهر الانهيار المجتمعى الذى نشهده نتيجة العديد من العوامل منها استبدال ثقافتنا النابعة من ديننا وعاداتنا وتقاليدنا بالثقافة الغريبة
وليسمح لى من ينادى بالزواج المبكر أن أسأل ما معنى الزواج المبكر ؟
ولى عودة
أولا يا عاليا عايزة أقول لك انى معجبة بمدونتك جدا من زمان بس دى أول مرة أعلق فيها على موضوع من مواضيعك الجميلة و أرجو انك تقبلى صداقتى
المشكلة فى رأيى فى نظرة الشباب للبنات و نظرة البنات لنفسهم أصلا و أظن ان ده راجع للأفكار اللى اتربوا عليهاو
للمفهوم السطحى للحب وللحرية
يارا
راحى :)
عايش و لكن :)
هدى :)
صوت من مصر :)
الطائر الحزين :)
عرفة مش عارف ليه :)
الأزهرى :)
شكراً على مشارطتم جاءت مفيدة م مكملة للموضوع و بس يا راجى الزواج المبكر مش شرط يكون هو الحل
يارا :)
سعيدة جدا و شاكرة للأهتمام بالمتابعةو التعليق و طبعاً أقبلك صديقة ما أقبلكيش ليه يعنى
:)
------------
المهم أعذرونى كلكم عشان مش قادرة أرد على كل واحد لوحده كالعادة أنتوا عارفين بأه
:))))))))))))
Post a Comment